(11/10/2013)
O alcalde estradense, José López, cumpriu onte co seu compromiso plenario e recibiu á plataforma local de emigrantes retornados. Coñeceu de primeira man a problemática dos emigrantes aos que a Axencia Tributaria reclama multas e atrasos por pensións do estranxeiro non declaradas.
A plataforma buscaba, sobre todo, o respaldo político de López, como alcalde e deputado provincial do PP. Quería que fixese forza no partido para cambiar a lexislación. Os afectados consideran inxusto ter que tributar por ingresos superiores a 11.200 euros polo feito de ter dúas pensións distintas, por mínimas que sexan.
Os integrantes da comisión de representantes da plataforma exemplificaron a inxustiza con casos propios. Como o dun xubilado que cobra 171 euros dunha pensión de Francia e outra local a maiores, sumando 700 euros mensuais que o obrigan a tributar. «Outros con pensións de aquí de 1.000 euros non pagan», quéixase. Máis singular aínda é o caso doutro xubilado que declaraba unha pensión española e outra de Francia, pero agora se lle reclaman 30.000 euros por unha terceira pensión trimestral complementaria, tamén francesa, que nunca se lle dixo que tiña que declarar.
A plataforma reivindica un cambio na lexislación, a revogación de todos os expedientes de multas e atrasos e a devolución a quen xa afrontaron o pagamento. «Nós non lle imos cobrar intereses», chanceaba un interesado.
Tras hora e media de diálogo, o alcalde estradense accedeu a exercer de mediador ante o presidente da Deputación e do PP provincial, Rafael Louzán, para facerlle partícipe do problema e tratar de sensibilizarlle. López contactou telefonicamente con Louzán, que se comprometeu a visitar A Estrada a próxima semana para reunirse coa plataforma.
O colectivo participará o martes na concentración convocada pola coordinadora galega en Santiago. Será ás 11.00 horas ante o Parlamento, onde se celebrará o Debate do Estado da Autonomía.
Bus para a concentración
Fretarase un bus desde A Estrada. Os interesados en facer uso del deben chamar aos teléfonos 618 156 097 ou 986 575 022.
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas