A Cámara galega acorda pedir o Goberno que regularice a situación dos retornados afectados polos cobramentos de Facenda.

(13/09/2013)

A Cámara galega acorda pedir o Goberno que regularice a situación dos retornados afectados polos cobramentos de Facenda.

E. F., Vigo | 11 Setembro 2013 - Cronicas de la Emigración-

A Cámara galega aprobou onte por unanimidade en sesión plenaria celebrada no Parlamento autonómico as propostas dos socialistas galegos en relación co cobramento de cantidades pendentes aos pensionistas retornados por parte da Axencia Tributaria. As devanditas propostas céntranse en solicitar ao Goberno central regularizar a situación dos pensionistas sen consideralos como defraudadores fiscais, ofertando información pormenorizada e homoxénea das súas obrigas fiscais; habilitar, no caso de que teñan que afrontar pagamentos polas súas declaracións complementarias, períodos de pagamento máis longos que os estipulados habitualmente, para evitar un quebranto económico nas unidades familiares destes pensionistas, e eximir do pagamento de sancións aqueles pensionistas que regularicen a súa situación fiscal. Tamén se pide que se revisen os convenios marco con outros países para evitar que situacións deste tipo poidan volver producirse no futuro e que se teñan en conta todos os criterios anteriores para estimar os recursos que se presenten ante as sancións xa comunicadas.

A representante socialista, Carmen Gallego, denunciou na Cámara a "estratexia premeditada" que está a levar a cabo a Axencia Tributaria por orde do Goberno central contra un grupo de persoas que "non" son millonarias", senón que perciben pouco máis de 700 euros mensuais, repartidos en dúas pagas: a que perciben do Estado español e a do estranxeiro, grazas a acordos asinados en época franquista e ratificados posteriormente, nos que "non" queda claro que teñan que pagar a dobre imposición", recordou Galego. Como exemplo, aludiu a persoas que están a cobrar 53 euros mensuais de pensión por traballar en Francia ás que a Facenda estatal lles reclama cantidades superiores ás que perciben.

Nese contexto, fala de falta de "información" e esixe "xustiza", porque "ninguén cre" que os prexudicados pola iniciativa da Axencia Tributaria, que afecta sobre todo a retornados de Galicia e Andalucía, "se puxesen de acordo para defraudar a Facenda pública".

Ante esta situación, na súa proposición non de lei, os socialistas, por iniciativa de seis dos seus deputados, entre os que figura Carmen Gallego, esixían ao Goberno central que se facilite información para que os afectados saiban a que aterse; que se dispense un tratamento homoxéneo nas distintas oficinas da Axencia Tributaria; que se lles exima do pagamento das sancións e que non se cobre aos afectados os intereses de demora e que se se comproba que ten que pagar as cantidades que se lles esixe, se poida facer "nun prazo que non os afogue".

As medidas formuladas polo Grupo Parlamentario Socialista na Cámara galega foron avaladas polo voceiro dos 'populares', Pedro Puy, quen dixo estar de acordo coas propostas, agás no que atinxe a eximir do cobramento dos intereses de demora, porque estes "veñen avalados pola lei", dixo, o que foi aceptado pola deputada socialista.

Os restantes grupos da oposición (BNG e AGE), que tamén avalaron a proposta do PSdeG, mostráronse especialmente críticos coa actuación do Goberno central ao respecto e cualificárona de "estafa" e "roubo a man armada".

"Ninguén pode pensar que os retornados non queren pagar impostos" e a medida da Axencia Tributaria está a afectar á "parte máis débil da sociedade", dixo a deputada do BNG, Teresa Paz, quen asegurou que "Galicia necesita dunha Axencia Tributaria propia que mire polos "intereses" dos galegos.

Por Alternativa Galega de Esquerda (AGE), José Javier Ron Fernández, acusou o Estado de intentar solucionar os seus problemas económicos atacando os pensionistas, "facendo algo ilegal e inxusto", alegou, e acusou os 'populares' galegos de estar a permitir esta situación que para o único que serve é para "cubrir os ocos da banca ou dos partidos políticos".

Puy respondeulles reprochándolles as súas alusións á Axencia Tribuaria. "Que a Axencia Tributaria rouba non se pode dicir", dixo, e matizou: "Non" se poden dicir "cousas que afectan á lexitimidade do sistema".