A Estrada activou unha plataforma de afectados polas multas impostas pola Axencia Tributaria a persoas que cobraban pensións do estranxeiro que non declaraban. A primeira das súas medidas será a recollida de firmas para esixir a anulación dos expedientes sancionadores, a devolución do diñeiro a quen xa pagaron as multas e a paralización dos requirimentos. Os integrantes da plataforma iniciaron xa a recollida de firmas de forma individual nos seus barrios e parroquias. No entanto, mañá mércores a plataforma aproveitará a xornada de feira local para facer unha recollida conxunta. Instalarán un posto na Praza da Feira -xunto á pescadería Carbia- no que se informará sobre a problemática e animarase a apoiar a causa dos pensionistas a todos os transeúntes. A caseta funcionará de 11.00 a 13.00 horas.
Esperando incorporacións
A plataforma de afectados naceu por mor da reunión informativa promovida polo BNG e celebrada o mércores pasado no teatro Principal. Daquela asemblea xurdiu un grupo local para defender os intereses dos afectados. O xerme constituínte está integrado por 16 persoas, pero a plataforma espera que as adhesións vaian crecendo nas próximas semanas. Os promotores están convencidos de que cantos máis integrantes somen maior será a súa capacidade de presión. Oito dos membros constituíntes da plataforma ofreceron onte pola tarde unha rolda de prensa para dar a coñecer o colectivo e os seus obxectivos.
A plataforma aínda non se organizou internamente e non elixiu presidente ou portavoz. Onte falou en nome de todos Ana Rodríguez -filla dun dos afectados-, que animou aos estradenses a sumar apoios.