«Somos emigrantes, non defraudadores». Foi o berro que saíu onte das máis de duascentas persoas que se concentraron ante a Axencia Tributaria de Pontevedra no que foi a primeira das protestas de afectados galegos polo conflito das pensións do estranxeiro.
Aínda que non dispoñen de cifras oficiais, os convocantes estiman que só na comarca do Morrazo poden ser entre catrocentos e seiscentos os afectados, mentres que na de Pontevedra poden roldar o medio milleiro. «En todo o país existe esta problemática», precisou Maruchi Álvarez.
A portavoz do Morrazo subliñou que o problema xurdiu entre febreiro e marzo pasados, cando miles de pensionistas en toda Galicia comezaron a recibir requirimentos de Facenda. Todos eles cobraban dous subsidios, un nacional e outro estranxeiro. Sobre este último, manteñen que «nunca se nos comunicou que tiñamos a obriga de declaralo. Como agora estamos nun país con moita falla de diñeiro, os que nos gobernan se acordaron que o máis doado é tocar na clase obreira e requerir aos pensionistas as súas declaracións. Eles destaparon aquí unha mina de ouro».
No fondo, o conflito susténtase na idea dos dous pagadores. A lexislación española establece que se debe declarar sempre que a suma de dúas ou máis pagadores supere os 11.200 euros anuais, mentres que se só hai un ingreso unicamente é obrigatorio realizar a declaración se se perciben máis de 22.000 euros ao ano. É por iso que non dubidan en cualificar a súa situación como discriminatoria con respecto a outros pensionistas.
Facenda remontouse ao 2008 para requirir o pagamento do non declarado, unha cantidade á que se suman intereses de demora e unha sanción económica.
Á marxe da vía administrativa ou, incluso, xudicial, mediante a interposición de recursos, a intención das plataformas de afectados é lograr unha saída política. Neste marco, unha vez noméense en próximas datas uns interlocutores a nivel autonómico, solicitaranse entrevistas con representantes políticos. Consideran que a solución definitiva pasa por cambiar a actual lexislación e establecer unha amnistía fiscal.
