(18/06/2013)
A CE defende política de inmigración con visión de futuro e financiamento
17-06-2013 / ABC/ EFE
A Comisión Europea (CE) defendeu hoxe a necesidade de despregar unha política de inmigración con visión de futuro e garantir un financiamento axeitado para o seu cumprimento, co obxectivo de atallar o número crecente de ataques xenófobos en Europa e fomentar o crecemento económico.
"A nosa estratexia sobre inmigración debe reflectir as nosas prioridades comúns e necesidades futuras. As políticas orientadas ao futuro e o liderado político son necesarias para converter a inmigración nunha forza dinámica para o crecemento e o progreso", dixo a comisaria europea de Interior, Cecilia Malmström.
"Moitas destas persoas están altamente cualificadas e debemos darlles a oportunidade de desenvolver todo o seu potencial nos seus novos países", agregou a comisaria nun comunicado.
Á luz das conclusións do cuarto informe anual sobre inmigración e asilo que elabora o Executivo comunitario, a institución busca a implicación do Parlamento Europeo e do Consello da Unión Europea (UE) para impulsar medidas lexislativas actualmente sobre a mesa.
Entre outros, a CE recomenda mellorar a xestión dos fluxos de viaxeiros nas fronteiras exteriores dos Veintisiete, reforzar as políticas de inmigración e integración, así como acelerar a loita contra a inmigración irregular e a trata de persoas.
Ademais, pide garantir o financiamento axeitado para desenvolver estas políticas no presuposto plurianual correspondente ao período 2014-2020, ao tempo que aconsella os Estados membros que fagan polo momento un uso eficiente dos recursos dispoñibles.
Segundo os datos do Eurostat, a oficina de estatística comunitaria, a UE negou a entrada a 316.060 inmigrantes o pasado ano, un 8% menos que en 2011, aínda que as peticións de asilo aumentaron un 9,7%, ata as 330.000.
Isto é resultado dun número crecente de demandantes sirios, aos que se suman as peticións de países como Afganistán, Rusia, Paquistán e Serbia, segundo se desprende do informe da Comisión.
O Executivo comunitario quere, entre outros, acelerar a adopción de directivas sobre os traballadores estacionais e do persoal destinado a outro país dentro dunha mesma empresa, ao tempo que busca clarificar as normas para estudantes ou investigadores de terceiros países nos Veintisiete.
Así mesmo, prevé mellorar a cooperación a través da creación da Oficina Europea de Apoio ao Asilo e reforzar a solidariedade con Grecia, que acolle gran parte dos refuxiados sirios.
Finalmente, a CE trata de crear o Sistema de Vixilancia de Fronteiras Europeas (EUROSUR), para facilitar a detección de embarcacións pequenas con inmigrantes ilegais, mentres que pretende reforzar os procedementos de verificación de viaxeiros estranxeiros nas fronteiras.
|
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas