Estes datos extraídos do Instituto Nacional de Estatística son o que permitiu a Beatriz Mato concluír que «non só Galicia non está peor, senón que está mellor que a media estatal». A continuación, a conselleira asegurou que, durante o tempo en que socialistas e nacionalistas gobernaban a Xunta, eran máis de 13.000 os mozos que anualmente deixaban Galicia. Por iso, Mato espetou a Vicente Docasar: «Hai que pór as cousas no seu sitio: hai emigración, sempre a houbo, pero non crece».
Con todo, o socialista persistiu nas súas críticas e lamentou que antes a comunidade «exportaba man de obra barata» e agora siga o mesmo camiño «man de obra altamente cualificada». «Hai que tomar decisións rápidas e contundentes para parar isto, para non deixar ao noso país sen futuro», remachou.
Respecto diso, Mato asumiu que os datos de emigración xuvenil «non son aceptables», como tampouco que haxa «máis de 51.000 mozos en paro» en Galicia, pero enumerou os plans postos en marcha pola Xunta e o Estado para asegurar que traballa para que «todos eles poidan quedar» na súa terra.
