(07/06/2013)
Valentín García visita os estudantes de galego do Instituto Canella Blanch de Londres
Cronicas de la Emigración
Redacción, Londres | 06 Xuño 2013 -
O secretario xeral, durante o homenaxe John Rutherford.
O secretario xeral de Política Lingüística da Consellería de Cultura, Educación e Ordenación Universitaria, Valentín García, visitou este mércores, día 5, o Instituto Español Vicente Cañada Blanch de Londres, no marco da viaxe oficial que está a realizar no Reino Unido para achegarse a centros do exterior nos que se imparte docencia da lingua, literatura e cultura propias de Galicia.
Na visita, Valentín García estivo acompañado pola directora do IE Vicente Cañada Blanch, Maribel Martínez, e polo profesor Xaime Varela, que imparte galego neste centro preuniversitario do exterior grazas a un convenio que vén renovándose dende o ano 1991 entre a Consellería de Cultura e Educación e o Ministerio de Educación, Cultura e Deporte, entidade da que depende o centro educativo.
'Fala Londres' e as TIC na educación
O blog educativo en galego do IE Canella Blanch, 'Fala Londres', recibiu hai uns meses o recoñecemento de 'Boa práctica 2.0', que lle outorgou ao profesor Xaime Varela o Instituto Nacional de Tecnoloxías Educativas e de Formación do Profesorado (INTEF), por constituír unha iniciativa garantista da incorporación das tecnoloxías da información e da comunicación á práctica docente con novos enfoques metodolóxicos e novas estratexias didácticas.
Nel recóllense diversas propostas de ensino e aprendizaxe con aplicacións da web 2.0 realizadas con alumnado de educación primaria, ESO e bacharelato nas que as tecnoloxías serven de apoio ao enfoque comunicativo da aula de lingua e promoven a participación e a cohesión da comunidade educativa. Ademais, informa de todas as actividades culturais relacionadas coa materia que se producen no centro e das noticias de interese relativas a Galicia que teñen lugar en Londres.
Pódese acceder a el no enlace http://galegoenlondres.blogspot.com.es/.
Homenaxe a John Rutherford, en Oxford
Previamente, Valentín García abriu a axenda de actos institucionais no Reino Unido coa participación na homenaxe que o Centro de Estudos Galegos (CEG) de Oxford lle rendeu ao tradutor e hispanista que o fundou en 1991, John Rutherford.
Como tributo ao seu labor de difusión e de proxección internacional da lingua, cultura e literatura propias de Galicia, o CEG de Oxford -un dos tres ingleses que dependen da Consellería de Cultura e Educación, en virtude dun convenio de colaboración- denominarase de aquí en adiante CEG 'John Rutherford'.
Ao acto asistiron, ademais do secretario xeral e do homenaxeado, o lector de lingua, literatura e cultura galegas deste CEG, Diego Pardo; a directora e o profesor de galego do IE Vicente Cañada Blanch, Maribel Martínez; e Xaime Varela, respectivamente; e tres ex lectores, Xelís de Toro, María García e Laura Sáez.
Ao longo da súa ampla traxectoria como embaixador internacional da lingua, literatura e cultura galegas, o tradutor e hispanista traduciu ao inglés autores como Alfonso D. Rodríguez Castelao ou Xosé Luis Méndez Ferrín. Rutherford é, ademais, dende o ano 2008, membro de honora da Real Academia Galega e, dende 2012, doutor 'honoris causa' pola Universidade da Coruña.
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas