Un nutrido grupo de inmigrantes, na súa maioría procedentes de Sudamérica e África, participaron onte en Ribeira nun foro no que analizaron as dificultades coas que se atopan a nivel laboral e sanitario, así como os problemas de acoso policial que sofren algúns. En varios grupos de traballo púxose de manifesto que os recortes en materia social aplicados por mor da crise están a propiciar vulneracións no cumprimento dos seus dereitos.

Pola tarde, o colectivo celebrou unha concentración na praza do Concello. Dous representantes da organización barbancesa Contacto, de axuda aos estranxeiros, Minerva Velázquez e Lola Durán, leron un manifesto no que se reclama un compromiso cos vínculos de apoio mutuo entre «as persoas autóctonas e as inmigrantes, sobrevivindo e loitando pola xustiza, igualdade, dignidade ao que todos os seres humanos temos dereito». Membros da ONG Médicos do Mundo sumáronse á concentración.