Pontevedra. Alumnos estranxeiros anticipan as probas do selectivo
(29/05/2013)
Alumnos estranxeiros anticipan as probas do selectivo
Medio centenar de persoas iniciaron os exames no centro da UNED
pontevedra / a voz 28 de maio de 2013
«As sensacións son sempre boas, pero imos esperar», di Alberto González, de 21 anos, sobre os seus primeiros exames da selectividade. Este mozo venezolano é un dos 48 estranxeiros e españois que estudan en centros adscritos en países foráneos que desde onte realizan as probas do selectivo no Centro Rexional Asociado á UNED. A maioría destes alumnos proceden de países suramericanos (sobre todo de Perú, Colombia e Venezuela), aínda que tamén hai 16 españois examinándose que estudan fóra e outros mozos proceden de países como Kuwait (5) e Rusia (1).
Por primeira vez, o centro da UNED acolle estes exames para todo o noroeste peninsular, unha semana antes que os de acceso ordinario á universidade. Ata agora, os estranxeiros residentes en Galicia tiñan que desprazarse a Madrid para o selectivo.
Historia da Filosofía ou Historia de España
Os estudantes estreáronse pola mañá coas materias obrigatorias, a elixir entre Historia da Filosofía ou Historia de España. Alberto optou pola filosofía e, entre Aristóteles e Marx, polo primeiro. «E xenial, o clásico de toda a vida, aínda que agora hai que esperar as notas». Este venezolano vive en Santiago e espera que a media lle permita estudar Psicoloxía. O segundo exercicio foi o de comprensión lectora e, pola tarde, celebrábase o de lingua estranxeira.
En tres días
As probas prolongaranse ata mañá, en horario de mañá e tarde. «En Venezuela facémolo todo nun día», engade Alberto, que comenta esta primeira sesión xunto aos seus compatriotas Milagros Seguín, de 17 anos, e residente en Ourense, e Daniel González, da mesma idade.
Aínda que naceu en España, Milagros estivo a vivir dous anos no país suramericano. «Ao graduarme alí o pasado ano teño que facer esta proba -explica a moza-. Alá é un ano menos de Bacharelato. Así que durante este inverno estiven nunha academia preparando o selectivo». Ela elixiu Historia de España e tivo que explayarse en preguntas sobre o franquismo, o desastre do 98, o reinado de Fernando VII e a primeira República. «Bo, saíume bastante ben», conta, mentres explica que espera cursar a titulación de Administración de Empresas no campus de Ourense.
«A educación de aquí gústame máis»
Anastasia Boiko é unha moza rusa de 21 anos que reside en Valladolid e espera cursar alí a carreira de Arquitectura. O certo é que, di, xa levaba dous cursos en Salamanca. Aínda que este ano se decatou de que non lle homologaban os seus estudos de Bacharelato en Rusia «porque alí é un ano menos» e conta que lle anularon o seu expediente, polo que deberá comezar desde cero a carreira se agora supera o selectivo. «Non se que tal me me saín, porque a verdade é moi complicado, moita historia...», sinala. Conta que a súa avoa é unha das nenas da Guerra que foron a Rusia e que na procura das súas orixes está a súa intención de vir a España. Leva tres meses preparando o selectivo nunha academia e subliña que «aquí a educación me gusta máis, son máis abertos os profesores, e a xente é moi aberta e familiar». Hoxe quédalle Historia da arte e Técnicas Gráfico Plásticas. «Se non aprobo, en setembro intentareino outra vez», afirma.