GALEGO | ESPAÑOL

PORTAL DA INMIGRACION NOS CONCELLOS DE GALICIA
ObxectivosIntegraciónFerramentas
-LexislaciónOrganismos-

Emigración asina en Montevideo un convenio de colaboración co maior hospital mutualista de América Latina

(20/05/2013)

Emigración asina en Montevideo un convenio de colaboración co maior hospital mutualista de América Latina

 
  • O secretario xeral da Emigración asistiu, ademais, ao concerto solidario de Lorena Lores e Lucía Pérez na capital uruguaia, en beneficio doutra entidade senlleira, o Hogar Español de Ancianos.
  • O éxito deste concerto, similar ao celebrado hai uns días en Bos Aires a favor das e dos afectados polas inundacións de La Plata, demostran os bos froitos que dá a colaboración entre as entidades galegas do exterior.
  • Rodríguez Miranda visita asemade nesta fin de semana tres localidades do interior de Arxentina con elevada presenza da diáspora galega.
 
Secretaría Xeral da Emigración - Xunta de Galicia
Santiago de Compostela, 18 de maio de 2013.

O secretario xeral da Emigración, Antonio Rodríguez Miranda, asinou en Montevideo un convenio de colaboración coa Asociación Española Primera de Socorros Mutuos, entidade que se caracteriza por prestar servizos sanitarios e asistenciais ás persoas en situación máis precaria, moitas e moitos deles cidadáns galegos e galegas.

Trátase, asemade, da entidade que xestiona o maior hospital mutualista da América Latina, e o primeiro que se fundou. Durante a súa xornada na capital uruguaia, Miranda departiu ademais co embaixador español en Uruguai, o ex conselleiro Roberto Varela, sobre a situación da colonia galega alí radicada.

O alto mandatario autonómico rematou a súa andaina na capital acudindo ao concerto solidario a beneficio do Hogar Español de Ancianos, iniciativa coa que se axuda a financiar as actividades desta entidade, que tamén presta servizos a moitos e moitas cidadáns galegos e galegas. O evento celebrouse na Sala Sodre do Auditorio Nelly Goitiño, coa colaboración de diversas entidades e institucións -entre elas a Unión de Sociedades Galegas no Uruguai, a Secretaría Xeral da Emigración e a Delegación da Xunta en Montevideo, e a Embaixada española-, e moi nomeadamente das artistas protagonistas, as cantantes galegas Lorena Lores e Lucía Pérez.

Estas dúas artistas subiron ao escenario de maneira altruísta, e a súa actuación tivo como prólogo un recital de grupos artísticos das comunidades galegas presentes en Montevideo. Lorena Lores, como tantas e tantos outros cidadáns galegos, é filla de emigrantes, polo que a diáspora é para ela un ámbito familiar e querido. No caso de Lucía Pérez, os seus primeiros éxitos profesionais tiveron lugar precisamente en Latinoamérica, e tense arestora convertido nunha icona das galegas e dos galegos do exterior tralo seu paso polo Festival de Eurovisión, celebrado en Düsseldorf hai agora tres anos, o 14 de maio de 2011.

Arxentina
Miranda viaxa hoxe sábado á República Arxentina, onde visitará enclaves senlleiros da diáspora en tres localidades do Gran Bos Aires, e mañá domingo outras dúas do interior do país. Así, en primeiro termo cursará visita ao Centro Galego de Avellaneda, fundado en 1899 polos primeiros galegos e galegas asentados nesta cidade do cinto da capital arxentina.

Despois, achegarase ata o Fogar Galego de Anciáns de Domselaar, entidade fundada en 1943 e coa que colabora a Xunta de Galicia, que desde o citado ano presta ininterrompidamente un exemplar servizo asistencial ás e aos maiores en situación máis precaria nacidos e nacidas na Galicia territorial e agora residentes na Arxentina, labor pola que se lle outorgou a Medalla de Galicia, na súa categoría de prata, no ano 1994.

Tamén visitará o secretario xeral o Hospital Español na localidade de La Plata, cuxo embrión data de 1886, que presta asistencia sanitaria a unha porcentaxe moi relevante da cidadanía galega alí residente, e que resultou seriamente afectado polas inundacións de abril que asolagaron boa parte da localidade. Precisamente, a colectividade galega, a Secretaría Xeral da Emigración, e a Embaixada española en Arxentina, organizaron en Bos Aires un concerto similar ao de onte en Montevideo, en beneficio do Hospital, e que tivo lugar hai uns días na capital arxentina.

Unión e forza
Precisamente, estes dous concertos solidarios -e o éxito que acadaron- dan boa proba da importancia da unión de esforzos entre as entidades galegas do Exterior, unha mensaxe na que adoita facer fincapé o secretario xeral da Emigración en tódalas súas viaxes.

Tamén en La Plata, o secretario xeral da Emigración visitará o Centro Galego, fundado no ano 1949, e que serve de lugar de encontro das e dos milleiros de galegos asentados na cidade. Esta entidade, e mailo delegado en Bos Aires, Alejandro López Dobarro, coa súa presenza sobre o terreo, mantiveron permanente contacto coa Xunta de Galicia desde o primeiro momento en que tiveron lugar as inundacións, coa fin de facer un seguimento da situación.

Agora, Rodríguez Miranda estudará as posibilidades de intensificar a colaboración coas familias galegas danadas polas inundacións a través do Centro Galego, dando así continuidade ao traballo neste sentido levado a cabo polas institucións galegas e españolas presentes na República Arxentina.

Domingo
No interior do país, e xa na xornada de mañá domingo, desprazarase ata Rosario, onde participará nunha ofrenda floral en homenaxe a Rosalía de Castro no Parque da Independencia organizada polo Centro Galego da localidade, cuxas instalacións visitará despois. O Centro serve desde o ano 1956 de catalizador das inquedanzas da colonia galega asentada nesta cidade do interior do país, especialmente no eido cultural e musical. Despois, Miranda rematará esta nova viaxe oficial no Centro Galego de Santa Fe, outra das cidades senlleiras do interior arxentino, con destacada presenza de cidadás e cidadáns galegos, fundada en 1919.

 

 

Novas e Actualidade


Titulares
Histórico


 ACTIVIDADES

Marzo 2024
LMMeXVSD
    123
45678910
11121314151617
18192021222324
25262728293031
       



 AREA DE TÉCNICOS

 Usuario:
 Contrasinal:
 

 
¿Olvidou o seu contrasinal? | Alta

OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO

(c) 2009 FEGAMP, Federación Galega de Municipios e Provincias :: Texto legal
FEGAMPinmigracion@fegamp.es
Xunta de Galicia

Desarrolo: AVA Soluciones Tecnológicas