Miranda inicia unha viaxe por Venezuela, Brasil e México para coñecer as necesidades de case 110.000 galegos

(23/04/2013)

Miranda inicia unha viaxe por Venezuela, Brasil e México para coñecer as necesidades de case 110.000 galegos

Redacción, Santiago - Cronicas da Emigración | 23 de Abril de 2013

O secretario xeral de Emigración, Antonio Rodríguez Miranda, inicia mañá mércores unha viaxe institucional por tres países coa súa respectiva relevante colonia galega. Así, mañá mércores e o xoves estará en Venezuela, onde residen case 45.000 galegos, un 10 por cento do total de galegos residentes no estranxeiro.

Despois, dende o venres e ata o luns, o alto mandatario visitará Brasil, onde coincidirá en parte a súa axenda coa da conselleira de Traballo e Benestar, Beatriz Mato, que estará no país carioca de sábado a luns. Non en van, o contido fundamental deste novo periplo dos altos mandatarios da Xunta é subministrar a axuda que, no campo socio asistencial para persoas maiores galegas residentes en Latinoamérica, desenvolve o Goberno galego. Na República Federativa residen algo máis de 40.000 galegos, o 9,12% do total de cidadáns residentes no Exterior procedentes da Comunidade Autónoma.

Finalmente, e xa de novo en solitario, Miranda finalizará esta nova viaxe en México, onde estará martes e mércores da semana que vén. O último dos seus días compartirá a celebración do Primeiro de Maio que organiza o Centro Galego de México, unhas das manifestacións colectivas da diáspora galega con maior tradición e participación. Estímase que agora viven en México preto de 11.200 galegos, un 2,51% do total da diáspora no Exterior.

Os maiores

A visita das autoridades da Xunta a estes tres países, coas súas respectivas especificidades, céntrase en coñecer de boa tinta as necesidades das colonias galegas radicadas nas cidades con maior presenza da diáspora galega. O aspecto socio asistencial cobra especial relevancia, como o poñen de manifesto que se asinarán un total de sete convenios para mellorar as condicións de vida da colonia galega, especialmente das persoas maiores en condicións máis precarias.

Así, coa finalidade de contribuír á atención das necesidades socio asistenciais básicas dos cidadáns galegos, emigrantes directos ou en ocasión os seus descendentes, asinarase convenios con tres sociedades brasileiras: a de Socorros Mutuos e Beneficente Rosalía de Castro de Santos, a de Recreio de los Anciâos para Asilo da Velhice Desamparada de Río de Janeiro, e a Peña Galega da Casa de España, tamén en Río.

En Venezuela, asinaranse outros tres convenios coa mesma finalidade, un coa Irmandade Galega en Valencia, e dous -un da Secretaría Xeral de Emigración e outro do Consorcio Galego de Servizos de Igualdade e Benestar- coa Irmandade Galega radicada en Caracas.

Un último convenio, dos asinados nesta viaxe, ten por finalidade o mantemento dunha modesta pero necesaria oficina de información e asesoramento na sede da propia Irmandade capitalina venezolana, referente da diáspora galega e española.

 Achega á colectividade

Ademais dos centros sociais e asistenciais asinantes dos acordos, Rodríguez Miranda terá oportunidade nesta viaxe de coñecer outras sedes, e o correspondente tecido social, de entidades con importante presenza da colonia galega. Entre elas, a Fundación España Saúde en Venezuela; ou a Sociedade Hispano Brasileira de Socorros Mutuos e Instruçâo, o Centro Espanhol e Repatriaçao de Santos, a Sociedade Espanhola de Beneficencia Hospital Espanhol en Río, e o Club Español de Niteroi, en Brasil.

Ademais, conselleira e secretario xeral terán oportunidade de coñecer de primeira man as inquietudes e necesidades da colonia galega nestes tres países, de escoitar as cuestións que lles queiran trasladar os galegos alí residentes e as directivas das asociacións que os representan, e de saudar os galegos de idade máis avanzada que, tras unha longa vida de sacrificio, agora son obxecto da merecida solidariedade dos galegos.

No seu contacto coa diáspora, Mato e Miranda trasladarán a mensaxe da necesidade de unión entre as entidades galegas do Exterior, co obxectivo de crear comunidades máis fortes e que poidan garantir no futuro as mesmas ou maiores prestacións aos seus asociados. Neste aspecto, as comunidades galegas nestes tres países destacaron entre a 'Galeguidade' por iniciar este camiño fai xa algún tempo, e con recoñecido éxito.

 Vertente económica

Aínda que o piar fundamental da viaxe será o fortalecemento da solidariedade da Administración autonómica cos galegos do Exterior en situación máis precaria, tanto a conselleira de Traballo e Benestar, coma o secretario xeral de Emigración, aproveitarán esta nova estanza en terras latinoamericanas para fortalecer a mensaxe de cooperación en ambas as dúas beiras do Atlántico.

Especialmente en Brasil e México -ambos os dous países considerados en plena expansión económica-, o papel da colonia galega pode relevarse transcendental para levar a bo porto algúns plans de investimento na Galicia territorial por parte de empresas locais. Ademais, no caso concreto de México, boa parte do grupo de emprendedores con maior éxito de mercado na nación azteca son galegos ou descendentes de galegos, polo que xa mostraron en múltiplas ocasións o seu compromiso para axudar a novos proxectos de relación bilateral.