Maruja Mallo, 18 anos de añoranza entre a colectividade

(11/02/2013)

Maruja Mallo, 18 anos de añoranza entre a colectividade

Redacción, Vigo - |Cronicas da Emigración -11 de Febreiro de 2013-


O pasado día 6 de febreiro cumpriuse o 18º aniversario do falecemento de Maruja Mallo, a máis recoñecida das artistas galegas do século XX, quen pasou gran parte da súa vida en Arxentina, Uruguai e Estados Unidos. Nada en Viveiro, a profesión do seu pai levouna a residir en distintas provincias españolas ata a definitiva instalación en Madrid en 1922.
Anos máis tarde ingresa na Academia de Belas Artes e empeza a relacionarse coa nova mocidade de poetas e artistas que irrompen na escena española, algúns deles conformarían a Xeración do 27. Coñece a Dalí e á poetisa Concha Méndez, que a introducen no círculo da Residencia de Estudantes, onde estreita lazos de amizade e camaradería con Lorca, Buñuel e en especial con Rafael Alberti, co que mantén unha relación amorosa importante e longo tempo silenciada. Transgresora coas convenciones sociais do seu tempo, negóuselle ata hai pouco un lugar na historia da pintura galega e española.