• Realizada polo Consello da Cultura Galega, conta coa colaboración da Secretaría Xeral da Emigración da Xunta de Galicia.
• Estará aberta ao público do 6 de febreiro ao 28 de xuño no Museo Pedagóxico de Galicia (MUPEGA) de Santiago de Compostela.

O Arquivo da Emigración Galega do Consello da Cultura Galega vén traballando desde os seus inicios, en 1992, na recuperación e posta en valor da memoria e dos importantes legados dos emigrantes galegos e galegas. Moi logo prestou atención ás accións solidarias e exemplarmente altruístas de aqueles e aquelas que financiaron, implementaron, custearon e sostiveron as construcións escolares, retribuíndo a Galicia coas remesas propiciadoras da escolarización e da instrución. Un caso único o de Galicia, por certo, na historia das colectividades de emigrantes.

Para a realización destes e doutros proxectos de recuperación, ordenación e estudo do patrimonio legado polos nosos e as nosas emigrantes contou, e conta, o Consello da Cultura Galega coa colaboración e axuda da Secretaría Xeral da Emigración da Xunta de Galicia. Esta parcería fixo posible, entre outros proxectos, a catalogación das construcións escolares financiadas polos e polas emigrantes nas catro provincias galegas e, tamén, a exposición que agora se vai presentar.

Luces de alén mar. As escolas de americanos en Galicia vén a subliñar, dunha parte, a dimensión da efeméride do centenario fundacional das Sociedades Galegas de Instrución radicadas en América e, doutra, as súas realizacións académicas nas localidades de procedencia das e dos emigrantes.