O Centro Galego de Barcelona recibe a Medalla de Ouro ao Mérito Cívico da cidade condal

O Centro Galego de Barcelona recibe a Medalla de Ouro ao Mérito Cívico da cidade condal

Redacción, Barcelona -Crónicas da Emigración
 08 Xaneiro 2013 -


O Concello de Barcelona entregará a Medalla de Ouro ao Mérito Cívico ao Centro Galego de Barcelona no 120º aniversario da súa constitución. Na presentación da proposta, que foi aprobada por unanimidade, o concelleiro de Presidencia, Jordí Martí, asegurou que o Centro Galego "é unha das entidades máis importantes de Barcelona e, desde os seus inicios, un exemplo de integración e de participación na vida social, cultural e artística de Barcelona".

Ademais, asegurou que ao longo destes 120 anos "non só defendeu o espírito e a cultura de Galicia, senón que foi un digno embaixador de Barcelona e Catalunya fóra, en especial en terras galegas".

Martí tamén destacou que durante a súa traxectoria, o centro axudou a fortalecer os lazos fraternais "entre dúas nacións históricas", Galicia e Cataluña.

Entre as intervencións para explicar o voto a favor da concesión da Medalla, destacou a do socialista David Escudé, que foi na súa maior parte en galego.

A entrega da Medalla será o xoves da próxima semana ás 19,00 horas no Saló de Cent do Concello de Barcelona.