Gerardo Arias González foi membro fundador da entidade, vicepresidente, delegado cultural e presidente dende o ano 2009. Durante a súa intervención no acto manifestou a súa alegría por acharse á fronte dunha sociedade destas características. Aínda que recoñeceu que corren tempos difíciles e de austeridade, declarou o seu firme propósito de seguir apostando pola defensa, divulgación, promoción e difusión da cultura galega. Tamén tivo palabras de agradecemento para todas aquelas persoas que puxeron o seu gran de area durante estes anos e, principalmente, para aqueles e aquelas que, lamentablemente, xa non están presentes.

Ramiro Vieito, presidente da entidade dende o ano 1993 ata o 2007, desprazouse á cidade alemá para compartir unha data tan sinalada entre compañeiras e compañeiros de batalla, aproveitando a ocasión para agradecerlles o sacrificio e o traballo realizado durante estes vinte anos para levar a "nave" a bo porto. Destacou, así mesmo, a importancia de manter, fortalecer e agrandar, se cabe, o sentimento de Irmandade, punto clave na existencia desta entidade.

Con motivo desta celebración o Centro Galego publicou a revista XX anos do Centro Galego de Nürnberg na que se resume a historia, as andanzas, os logros, as experiencias persoais e as actividades realizadas durante este tempo. Marta Gonzalvo González, secretaria do centro, foi a responsable do deseño, maquetación e elaboración desta, e nela quíxose plasmar a pegada destes vinte anos de historia. Contouse coas colaboracións especiais da gaiteira Cristina Pato, de Antonio Marino, fundador da rede social Cabozo, Vìctor F. Freixanes, director xeral da editorial Galaxia e Agustín Fernández Paz, Premio Nacional de Literatura Infantil e Xuvenil e Doutor Honoris Causa pola Universidade de Vigo.

O Centro Galego sempre participou e colaborado en eventos gastronómicos e culturais celebrados na cidade, pero coa Banda de Gaitas e os grupos de baile chegaron a traspasar fronteiras, deixando a pegada da nosa terra en países como Holanda, Suíza, Escocia, Italia, Francia ou Inglaterra. Hoxe por hoxe, a tradicional festa do polbo que o centro organiza dende o ano 1993 consegue agrupar algunhas persoas membros da banda para deleite e alegría dos socios e socias, principalmente; nesta ocasión e, unha vez máis, o grupo Follas Novas de Frankfurt, conseguiu mobilizalas e, conxuntamente, sorprender ao público presente cun tradicional e bailable repertorio.