Os estranxeiros que compren pisos desde 160.000 euros obterán a residencia

(19/11/2012)

Os estranxeiros que compren pisos desde 160.000 euros obterán a residencia

A iniciativa está especialmente enfocada ao mercado ruso e chinés

Autor:

Efe

Data

 

O secretario de Estado de Comercio, Jaime García-Legaz, anunciou hoxe que o Goberno estuda cambiar a lei de Estranxeiría para outorgar o permiso de residencia aos estranxeiros que adquiran unha vivenda en España por importe superior a 160.000 euros.

Durante a súa intervención nun almorzo informativo organizado polo Economista e patrocinado por Ernst & Young e Promarca, García-Legaz explicou que esta iniciativa está especialmente enfocada ao mercado ruso e chinés e que o cambio normativo se porá en marcha en «algunhas semanas».

Respecto ao prezo mínimo de 160.000 euros, dixo que se trata dun «nivel equilibrado» que «tampouco daría lugar a unha demanda masiva de permisos de residencia», xa que asegurou que un prezo inferior podería servir de «escusa» para obter a residencia.

Segundo explicou, mañá haberá unha reunión cos ministerios implicados para tratar este cambio normativo co que o Executivo pretende impulsar a demanda externa de vivenda, nun momento no que a demanda nacional está paralizada e apenas se dá saída ao excedente de pisos construídos sen vender.

Asegurou que hai «moitísima» demanda do sector inmobiliario fóra de España e puntualizou que o mercado de vivendas español ofrece unha situación «moi atractiva» ante a caída considerable que tivo nos prezos. Así mesmo, valorou a competitividade deste sector pola súa proximidade ao resto de países europeos e a estabilidade política e xurídica que ofrece aos estranxeiros. «Nalgunhas semanas porase en marcha a reforma do decreto de estranxeiría para reactivar a demanda exterior e contribuír a reducir o 'stock' de oferta de vivendas», dixo, tras engadir que este cambio normativo tamén se levou a cabo en Irlanda e Portugal e está a ser valorado polos gobernos doutros países europeos.

O ministro de Exteriores, José Manuel García-Margallo, xa avanzou o pasado 14 de novembro no Congreso dos Deputados que o Goberno está acelerando os permisos de residencia para estranxeiros que adquiren propiedades inmobiliarias en España.