O Centro Galego de Bos Aires acolleu a celebración da 8ª Xornada Científica

(13/11/2012)

O Centro Galego de Bos Aires acolleu a celebración da 8ª Xornada Científica

M. Ruiz, Bos Aires -Crónicas de la Emigración- 12 Novembro 2012.



Patricio Griffin, Luís Costa, Carlos A Blunda, Jorge Picasso e Gabriel Vilarreal.

O Teatro Castelao do Centro Galego de Bos Aires acolleu a 8ª Xornada Científica, organizada polo Departamento de Docencia e Investigación da institución. A Xornada, presidida por Jorge Fernando Yansenson, titular do Comité de Ética Hospitalaria do Centro Galego de Bos Aires e docente de Bioética, na Facultade de Medicina da Universidade de Bos Aires, vertebrouse en torno da "ética e bioética para o equipo de saúde".
A organización, que estivo a cargo do Departamento de Docencia e Investigación do Centro, dirixido polo doutor Luís Alberto Costa e xefe do Servizo de Oncoloxía, contou coa colaboración do Comité Científico, integrado polas doutoras Ana María Abuín, xefa do departamento de Diagnóstico; Mónica Blanco, xefa do Servizo de Dermatoloxía; e Liliana Chiachiarelli, médica oncóloga; os doutores Luís Alberto Costa e Jorge Yansenson; a licenciada Laura Ruiz, xefa do Departamento de Alimentación, e o enfermeiro Carlos Díaz, do Servizo de Oncoloxía, co valioso achegue da intervención do Instituto Nacional de Asociativismo e Economía Social (INAES).
O acto de apertura estivo a cargo do presidente do Inaes, Patricio Griffin, quen destacou que o Centro Galego de Bos Aires "ten moita historia e moito que dar". "Ten -profundou- unha responsabilidade cara adiante extraordinaria, e que empecemos a traballar xustamente falando de ética en equipo é unha definición, é unha aposta pola vida, é unha aposta pola continuidade".
Sobre o Centro, Griffin asegurou que "é unha aposta para a saúde non só dos donos da entidade, senón de cada un dos galegos que é dono desta entidade e que contribuíu a crear este enorme edificio".
O dirixente subliñou, así mesmo, "o enorme esforzo investidor que durante moitísimos anos estivo ao servizo da comunidade e ao servizo dos galegos emigrados a Arxentina". "Algo -dixo- que non se debe deixar caer". Nesta dirección, precisou que "é o Estado arxentino o que asumiu unha responsabilidade moi importante, precisamente porque está convencido da importancia desta Institución para Bos Aires, para Arxentina". "Por iso -avanzou- é importante que entendamos que somos todos parte do mesmo barco, parte do mesmo esforzo". "É importante -advertiu- que todo o persoal da institución e a comunidade arxentina entendan o desafío que aínda temos".
Pola tarde, o interventor xudicial, Carlos A Blunda, pechou as Xornadas, destacando a importancia da actividade realizada, porque "é -dixo- un xeito de manter viva a tradición da entidade e de manternos en contacto co mundo da investigación científica, que é un área que o Goberno nacional defende moitísimo".