O censo retárdase en Ames tras caer a inmigración nun 5%

(25/09/2012)

O censo retárdase en Ames tras caer a inmigración nun 5% 

O verán acaba con preto de 29.800 veciños

Rexistran oitenta 'foráneos' menos ao ano

MARCOS MANTEIGA AMES  25.09.2012

O máis que acusado crecemento do padrón amiense, que auguraba alcanzar os ansiados 30.000 veciños este mesmo verán, tocou con óso... e chámase crise. Desta forma, desde o Concello confirmaban que despediron o mes de agosto con 29.760 habitantes, achacando a ralentización da afluencia de novos veciños ao baixón que experimentou a inmigración (oitenta persoas menos ao ano, un -5%).

Desta forma, e malia que o ritmo de nacementos parece que se mantén (case un rapaz ao día), o outro gran factor de crecemento poboacional, a afluencia de inmigrantes, si que parece ter perdido fol, dato do que o propio rexedor, o popular Santiago Amor, é consciente, e que pode deberse á acusada situación de crise que experimenta Europa fronte ao auxe dalgúns países suramericanos, como pode ser Brasil.