Vilagarcia. A Desalambrar recorda o drama da inmigración

(07/08/2012)

A Desalambrar recorda o drama da inmigración

Enchen de cruces a praia de Concha-Compostela con caras anónimas

Cruces instaladas na praia da Concha-Compostela. Iñaki Abella


REDACCIÓN / VILAGARCÍA O drama que sofren moitos inmigrantes no seu traxecto ás costas europeas foi reflectido onte pola Plataforma A Desalambrar na praia da Concha-Compostela. A plataforma cubriu unha ampla zona desta contorna con cruces nas que figuraban retratos de inmigrantes anónimos.

A intención da plataforma é facer visible a traxedia que supón a morte de miles de inmigrantes cada ano no seu afán de alcanzar as costas dos países desenvolvidos co único obxectivo de conseguir un futuro mellor. Os motivos da elección de Vilagarcía para facer patente este acto non foron casuais.

O porto de Vilagarcía viu como chegaban nas adegas de moitos barcos un importante número de polizóns, que arriscaron a súa vida para tratar de atopar un futuro mellor. Durante varias horas, as cruces estiveron situadas no areal vilagarcián. A plataforma mestura a arte co diálogo para dirixilos cara a unha conciencia que non pode ou non quere ver a realidade que existe tras a inmigración.