- Presentáronse 230 obras, das que 143 procedían da provincia de Pontevedra.
- Tódalas gañadoras recibiron cadanseu lote de regalos adaptados á súa idade.
- Destaca o feito de que o os nove premios recaesen nesta edición en rapazas.
Imaxe da entrega dos galardóns.
Imaxe da entrega dos galardóns.
A sede do Consello Escolar de Galicia foi o escenario da entrega dos nove premios correspondentes á segunda edición do concurso “Un mundo de cor”, acto que foi presidido polo subdirector xeral de Inmigración e Retorno, da Secretaría Xeral de Emigración, Antonio Aguarón, acompañado do subdirector xeral de Ordenación e Innovación Educativa e Formación do Profesorado, da Consellería de Cultura, Educación e Ordenación Universitaria, Manuel Vila López.
A gañadora da Primeira Categoría (alumnado de 1º a 3º de Primaria) foi Shital González, do CEIP Ramón Cabanillas de Santiago; a vencedora da Segunda Categoría (alumnado de 4º a 6º de Primaria) foi Paula Noya, do mesmo centro educativo; e co premio á Terceira Categoría (alumnado da ESO) alzouse Nuria Gómez, do CPI Covaterreña de Baiona.
Na Primeira Categoría foron galardoadas asemade co segundo premio Lucía Fernández, do CEIP Ramón Cabanillas de Santiago, e no terceiro posto ficou Alicia Mialache, que estuda no Colexio Cardenal Cisneros de Ourense. Na Segunda Categoría, obtivo o segundo premio Helena Fajín, tamén do CEIP Ramón Cabanillas de Santiago, centro no que tamén estuda a terceira premiada nesta categoría, Yiling Liu. Finalmente, na Terceira Categoría levou o segundo galardón Mariya Ilieva Palikarska, do IES Carlos Casares de Vigo, e o terceiro recaeu en Laura Vidales, do CPI Covaterreña de Baiona.
Unha edición en feminino
Cómpre salientar o alto índice de participación da provincia de Pontevedra nesta edición, que presentou 143 traballos dun total de 230 en toda Galicia. Por outra parte, tamén é salientable o feito de que as nove premiadas sexan rapazas, cando na primeira edición do concurso, o ano pasado, había tamén rapaces entre as e os galardoados.
Outro dato altamente significativo é o importante número de rapaces e rapazas non nados en Galicia, fillas e fillos de persoas inmigrantes radicadas en Galicia, que teñen participado nesta edición, sen dúbida motivados pola propia experiencia persoal e familiar.
Os premios
“Un mundo de cor” é unha iniciativa da Subdirección Xeral da Inmigración e do Retorno (da Secretaría Xeral da Emigración) na que participou a Subdirección Xeral de Ordenación e Innovación Educativa e Formación do Profesorado (da Consellería de Educación e Ordenación Universitaria). O obxectivo era que o alumnado de Educación Primaria e Secundaria Obrigatoria dos centros públicos, privados ou concertados de Galicia expresase a súa visión sobre a riqueza da diversidade sociocultural presente na nosa sociedade.
Na primeira e segunda categorías, tódalas premiadas recibiron un lote de libros infantís. Aparte dese lote, na primeira categoría, a primeira premiada foi agasallada cun caderno e unha caixa de pinturas, e a segunda cunha caixa de pinturas. Na segunda categoría, ademais do devandito lote de libros, o primeiro premio consistiu nunha PSP, e o segundo nun ‘mp-4’. E finalmente, na terceira categoría tamén tódalas premiadas recibiron cadanseu lote de libros, neste caso xuvenís. Asemade, a primeira galardoada fíxose cunha Playstation, e a segunda cun ‘mp4’.
Variedade e calidade
Un total de 230 obras foron recibidas en prazo na Secretaría Xeral da Emigración, das cales máis do sesenta por cento (143) remitíronse desde centros da provincia de Pontevedra, a máis participativa na experiencia. Precisamente, a capital do Lérez é a cidade con máis traballos presentados, mercé ao labor das rapazas e rapaces do Colexio da Nosa Señora das Dores.
Os traballos remitidos á Secretaría polas rapazas e rapaces escolarizados nos centros da Comunidade sorprenderon moi gratamente aos membros do xurado pola cantidade, variedade, e calidade, dos traballos presentados, igualando o nivel do ano pasado, que xa superara tódalas expectativas depositadas na iniciativa.
