(15/06/2012)
O Banco Mundial asegura que a inmigración axudará aos países en crise
A institución subliñou o efecto positivo que tería a mobilidade de persoas para aumentar fluxos de capital entre as nacións.
EFE/ Xoves 14 de xuño de 2012
O Banco Mundial (BM) afirmou hoxe que os emigrantes mitigaron os efectos da crise en países desenvolvidos á vez que seguen mantendo a súa influencia positiva en países en desenvolvemento grazas ao envío de remesas.
Nun informe sobre a crise financeira global, o BM afirmou hoxe que a crise entre 2008 e 2009 non levou aos traballadores inmigrantes a volver aos seus países de orixe, pese "ao empeoramento do emprego e a retórica antiinmigrante nalgúns países de destino".
"De feito, os migrantes poderían mitigar algúns dos impactos da crise ao traballar por soldos máis baixos, recibir menos beneficios e depender relativamente pouco do Estado", indica o informe do banco multilateral.
Así mesmo, o vicepresidente do BM para redución da pobreza, Otaviano Canoto, indicou que "durante a crise, as remesas continuaron sendo fonte constante de divisa estranxeira para economías en desenvolvemento nun momento no que a axuda internacional non se incrementa e o investimento estranxeiro directo decreceu rapidamente".
A institución multilateral subliña o efecto positivo que tería a eliminación de barreiras á mobilidade de persoas para aumentar os fluxos de capital entre as nacións e evitar os efectos adversos da crise.
"As remesas son o máis tanxible vínculo entre migración e desenvolvemento", indica o informe, que cifra o achegue destes envíos de diñeiro no mundo nos US$ 399.000 millóns para 2012, por encima do volume de 2011.
"Contrariamente ao que se esperaba, non atopamos evidencias do retorno de emigrantes, ata despois de que a crise financeira reducise as oportunidades de emprego en Estados Unidos e Europa, con moitos países, como España, ofrecendo incentivos para o retorno de inmigrantes", sinala o BM.
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas