A comunidade galega de Barcelona recorda a Parallé

(13/06/2012)

A comunidade galega de Barcelona recorda a Parallé

A cidade condal será escenario o día 29 dun acto en memoria do poeta

Autor:

ramón Loureiro

Localidade:

ferrol/la voz 

Data 13/06/2012

  

Xosé María Pérez Parallé, nunha das súas últimas fotografías.

O Centro Galego de Barcelona celebrará o día 29, na súa sede da Rambla Caputxins, un acto de homenaxe á memoria e á obra de Xosé María Pérez Parallé. Un acto literario en memoria do escritor nacido en Ferrol no ano 1909 e fincado durante boa parte da súa vida en Fene (no lugar do Penedo, en Barallobre, concretamente) que representa, como moi poucos outros creadores fano na tradición galega, esa figura do poeta popular cuxa voz atopa no pobo os seus maiores afectos. Están a piques de cumprirse os 25 anos da morte de Parallé. E o cuarto de século transcorrido desde o seu falecemento non só non escureceu a súa figura, senón que arroxou nova luz sobre ela.

Traballador de Astano, onde se ocupou tanto da formación dos aprendices do estaleiro -fora alumno da Universidade de Santiago- como doutro tipo de tarefas -entre elas, a administración dun dos departamentos desde os que se distribuía o material de oficina-, Parallé, pai do ceramista Pérez Porto, era un daqueles galeguistas para os que Galicia era, ante todo, unha emoción e unha causa á que entregaban todas as súas forzas. Xamais deixou de acudir alí onde foi chamado. E durante a Transición foi habitual a súa presenza en todo tipo de actos públicos nos que o poeta era requirido para ler -ás veces ante miles de persoas- os seus versos. Uns versos que achegaron á poesía a verdadeiras multitudes, dun xeito que resulta difícil imaxinar hoxe, neste tempo difícil no que, ás carencias de entón, súmase ademais, por desgraza, a desesperación.

Especialmente querido

Ben pode dicirse del, sen temor algún a caer na esaxeración, que era un home especialmente querido. E hoxe, estea onde estea, sigue séndoo.