Atopada finalmente na antiga escola obradoiro do porto, a peza foi restaurada, e onte volveu lustrosa ao seu lugar orixinal para seguir sacando o pano e dicir Adeus, que ese é o nome da obra. Foi un proceso a marchas forzadas, porque os operarios aínda andaban o mércores sacando brillo da estatua, a escasas horas do momento da reinauguración.
Foi un acto sinxelo pero ao que asistiron a maioría dos concelleiros do grupo de goberno e tamén da oposición socialista, porque como recordou o alcalde, Tomás Fole, «toda a corporación cría que era necesario».
Homenaxe a Rosalía
Por suposto estivo o autor, que agradeceu ese esforzo por recuperar do esquecemento unha figura que, como outras pezas de Lombera, era xa un símbolo do porto de Vilagarcía.
Unha grúa do Concello trasladou a estatua ao parque e achantouna, coa axuda dos operarios municipais, no pequeno peirao. Logo das pertinentes fotos e apertas pola recuperación da peza, César Lombera explicou a intención da obra, que viña sendo, por unha banda, un recordo ao vello peirao de ferro, e por outra, á emigración. De paso, tamén a Rosalía de Castro e á súa obra, coincidindo co día das Letras Galegas.
O Adeus trátase dunha peza fundida en bronce que, como explicou a seu autor, leva unha pátina brillante nalgunhas partes, mentres que outras foron tratadas a base de ácidos para escurecelas.