(16/05/2012)
Investigadores do proxecto "Galicia Mundi" recollen datos sobre a situación das entidades galegas en Bélxica e Suíza
No que queda de ano desprazaranse a Brasil, Venezuela, Reino Unido e Alemaña
E.E. 15 de maio de 2012,
O grupo de investigación responsable do proxecto "Galicia Mundi: actualidade e prospectiva do asociacionismo galego non exterior. Os retos en materia educativa, social e cultural", que dirixe Vicente Pena Saavedra, pedagogo e profesor da Universidade de Santiago de Compostela, continúa as súas actividades de traballo de campo "in situ", nesta ocasión en diversos países de centroeuropa.
Entre o 4 e o 14 de maio, dúas investigadoras compoñentes do equipo, María Esther Olveira e Silvana Longueira estiveron en Bruxelas e Zúric. Nas dúas cidades realizaron unha serie de cuestionarios á mocidade galega ou descendente de galegos, ás persoas adultas de primeira e segunda xeración, e a directivos das asociacións galegas radicadas en cada cidade.
Tamén procederon a efectuar distintas entrevistas a dirixentes societarios e membros relevantes da comunidade, orixinarios de Galicia, así como a promover foros coa mocidade e sondaxes integrais co propósito de coñecer coa maior exhaustividade posible a situación na que se atopan na actualidade as agrupacións galegas en cada unha das localidades e dos países de referencia, e cales son as súas expectativas. Máis adiante, na segunda quincena de maio e no mes de xuño, outros membros do equipo investigador desprazaranse a varios enclaves do interior da Península, onde a presenza galega conta cun notable arraigamento e unha traxectoria moi dilatada.
No que queda de ano os investigadores de "Galicia Mundi" desprazaranse a Brasil, Venezuela, Reino Unido e Alemaña.
|
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas