O Concello de Cee dedicou o pasado fin de semana unha xornada á emigración, nun acto composto por dous partes, por unha banda proxectouse o curto Casas de fume, protagonizado polo actor ceense Juanma Buiturón, e por outro se analizou o fenómeno migratorio na comarca de Fisterra a través dunha charla do historiador e técnico de Cultura municipal Víctor Castiñeira.
Ademais da proxección da curtametraxe, rodado en Almería, onde obtivo un premio no festival Posivideo deste ano, o propio actor explicou os detalles do traballo con outro vídeo sobre o making off, no que resaltou o feito de que detrás dunha obra de oito minutos existe un complexo labor na que participan decenas de técnicos e profesionais.
O curto narra o retorno dun emigrante galego desde Arxentina e a charla de Castiñeira, autor dun libro sobre a emigración, tratou precisamente da saída de galegos nos dous primeiros terzos do século XX cara ao continente americano.
O historiador calcula que en catro de cada cinco casas da Costa da Morte coñecen en primeira persoa o feito migratorio pola saída dalgún familiar nalgún momento do século pasado.
Só entre 1900 e a década dos 60 saíron uns 5.000 veciños de Cee, Corcubión e Fisterra cara a América en busca de traballo. A principios do século pasado eses tres municipios sumaban unha poboación total de 12.000 habitantes.
De todo ese éxodo, un 80 % dirixiuse cara a Arxentina, entre outras causas para escoller ese destino, destacou Castiñeira, destaca a presenza dun vicecónsul dese país en Corcubión na época, Manuel Miñones, quen ademais de ocupar ese posto, foi tamén cónsul de Alemaña, banqueiro, consignatario e alcalde de Muxía.
Él mesmo prestaba, hipotecando propiedades, as cantidades necesarias para que quen quixese puidese cruzar o océano, axudando ademais aos mozos a esquivar o servizo militar, entón longo e obrigatorio.
Castiñeira relatou tamén que moitos veciños da comarca que marcharon a principios do século XX dirixíronse á Patagonia xusto despois de que alí se descubrise petróleo. En 1907 o Estado arxentino fundou a empresa YPF, cuxo nomee soa ultimamente pola súa expropiación a Repsol. Nesa compañía estatal traballaron moitos veciños da Costa da Morte.
