(10/04/2012)
08/04/2012 - X.AGUIAR/O.UCHA/AGN
O subdirector xeral de Retorno e Inmigración, Antonio Aguarón, explica que, actualmente, non existen asociacións de inmigrantes chineses na comunidade galega -"polo menos que contacten connosco", puntualiza-. Indica tamén que nas actividades que o seu departamento organiza, e "nas que participa todo tipo de inmigración", tampouco "adoita haber inmigrantes chineses".
Respecto diso, o subdirector xeral insiste en que, ao non existir este tipo de colectivos, o seu departamento non conta cos datos suficientes para dispor dun "perfil do inmigrante chinés". "Descoñecemos un pouco cal é a súa formulación, incluso á hora de acceder ao país", recoñece.
Como posible razón, Aguarón apunta a que "a súa cultura é moito máis independente e non necesitan a unión que dá ese movemento asociativo". En cambio, destaca que a poboación chinesa ''mantén moitísimo as súas tradicións'', como a celebración do ano novo propio, aínda cando viven fosen do seu país de orixe. Neste sentido, matiza que este aspecto non se percibe moito en Galicia, onde a inmigración chinesa ''non é alta'', pero si nas grandes cidades españolas, como Madrid.
AUTOEMPREGO
Tamén recorda que estes inmigrantes se dedican, fundamentalmente, ao "autoemprego", ata o punto de entrar "a formar parte da xerga da xente". Todo iso a pesar de que en Galicia "aínda estamos a asistir á explosión dos comercios rexentados por chineses". "A xente di isto cómproo no chinés, pero non isto cómproo no romanés ou no caboverdiano e seguro que hai algún caboverdiano que ten un bazar", comenta o subdirector xeral.
Respecto diso, Aguarón engade que a poboación chinesa galega está asentada, fundamentalmente, nas cidades ou, como moito, nas poboacións dormitorio limítrofes con estes grandes núcleos de poboación, xa que "é onde existe unha maior concentración de establecementos que poden ser rexentados por eles". "Pouco sentido tería que un chinés se asentase en Chandrexa de Queixa se quere abrir un deste comercio", reflexiona.
Nesta mesma liña, o subdirector xeral sinala que "parece claro que son xente que vén cunha idea moi clara do que van facer" unha vez cheguen a terras galegas. "Desde o momento en que hai grandes cadeas de distribución de produtos chineses, teñen moi fácil acceder no seu país de orixe a toda a información que necesitan", aduce. "Digamos que xa veñen por unha vía un tanto organizada e montada do que pensan facer aquí", sentenza Aguarón.
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas