PP e PSOE abordarán nos próximos meses unha nova reforma da lei electoral co fin de aumentar a participación dos españois residentes no estranxeiro nos comicios xerais e autonómicos, despois do notable descenso que carrexou a introdución do chamado voto rogado.
A obrigación dos censados no exterior de comunicar persoalmente a súa vontade de exercer o sufraxio como paso previo a recibir as papeletas foi unha medida que se incorporou á lei a comezos do 2011 para garantir a identidade do elector e evitar manipulacións.
PP e PSOE reformuláronse a idoneidade do voto rogado á vista das queixas dos colectivos de emigrantes polo complicado do procedemento e da elevada abstención rexistrada nos distintos comicios celebrados no último ano.
O director do PP no Exterior, Alfredo Prada, e a secretaria de Emigración do PSOE, Carmela Silva, iniciaron xa conversacións para intercambiar ideas sobre como incentivar o sufraxio dos inscritos no Censo Electoral de Residentes Ausentes (CERA), segundo informaron a Efe.
Nas eleccións autonómicas celebradas en maio do pasado ano e nas xenerais do 20 de novembro, pediron votar un 10 por cento, pero só a metade lograron remitir a tempo a papeleta, debido ao axustado dos prazos e aos atrasos na recepción da documentación.
A fórmula do PP
Nos últimos comicios en Andalucía, votou o 7,1 por cento, e en Asturias, tocouse fondo cunha participación de só o 3,3 por cento dos residentes no exterior.
«Estes datos marcan unha tendencia de moi escasa participación. Hai que buscar unha fórmula que simplifique o sistema. O voto rogado ofrece garantía e seguridade xurídicas, pero é complicado e complexo», admite Prada.
A fórmula pola que se inclinaría o PP sería suprimir o voto rogado para quen depositen as papeletas nas urnas dos consulados e mantelo para os que o cursen por correo.
«Así votarían en igualdade de condicións que os residentes en España», opina Prada, ao recordar que o voto por correo en territorio nacional tamén require un trámite previo.
O dirixente do PP cre conveniente ademais explorar as oportunidades que ofrecen as vías telemáticas de voto empregadas xa poloutros países.
A solución socialista
O PSOE, en cambio, optaría por eliminar en todos os casos a obrigación de comunicar o desexo de votar, como se acordou no seu último congreso federal.
Segundo Carmela Silva, a solución pasa por favorecer o voto en urna nos consulados e que os residentes no exterior teñan a súa propia circunscrición electoral, no canto de estar distribuídos entre as 50 actuais.
A responsable socialista de Emigración subliña que todos os cambios que se fagan deben ser «moi rigorosos» e dirixidos a fomentar a participación, sen menoscabar a transparencia e as garantías do voto.
«Non podemos volver cometer erros», sinala Silva, quen rexeita fixar prazos para acometer a reforma da lei.
A pretensión de PP e PSOE é estender o diálogo a outros partidos, ás súas agrupacións no estranxeiro, a expertos e a foros sociais para lograr o maior consenso posible.