- Asegura que a cultura galega xogou e xoga na emigración un papel moi importante.
O presidente do Consello da Cultura Galega, Ramón Villares, visitou Bos Aires para participar en varios actos, dentro dunha xira que tamén o levará a outras cidades de importancia histórica para a emigración galega, como son Montevideo e São Paulo.
Segundo Villares a cultura galega na emigración xogou, e xoga, un papel moi importante porque unha gran parte da entidade galega construiuse non só na emigración, senón coa mirada das colectividades emigrantes que trataron de reconstruír a súa comunidade de orixe fóra de Galicia.
Na súa opinión, deberiamos ter un organismo que mantivese viva a cultura galega fóra de Galicia, pero a proxección exterior, en xeral, está moi fragmentada. É da opinión de que debería haber unha estratexia única, e unha estratexia de país para reforzar a marca de Galicia. Asegura que no que ao Consello respecta, tratan dalgún modo de sentar as bases do que hoxe se chama diplomacia cultural ou poder brando, é dicir, aquilo que poden transmitir a outros países como propio e que realmente dá un valor específico. E a emigración, a cultura, o Camiño de Santiago, todo isto dá a Galicia unha entidade, un perfil, unha marca de país e niso estase a traballar.