En total son 388.856 os inscritos no censo electoral de residentes ausentes (CERA), por 2.305.121 persoas rexistradas a efectos electorais na comunidade. A emigración non só mantén, senón que permite así que o censo electoral de Galicia siga aumentando a pesar da caída que o rexistro interior sofre desde hai tres anos.
A evolución do censo exterior aínda é máis evidente botando a vista cara atrás só dez anos. Nese tempo o CERA creceu en 108.512 integrantes, mentres que o de residentes en Galicia fíxoo en só 14.858 persoas, grazas aos repuntes de Pontevedra (25.806) e da Coruña (13.952), mentres as dúas provincias orientais sufriron análogos retrocesos nos seus censos internos (Lugo caeu 12.852 e Ourense, 12.048).
En total son 388.856 os inscritos no censo electoral de residentes ausentes
En cambio, o censo exterior creceu nas catro demarcacións desde o 2003, sendo o caso máis extremo o de Lugo, ao facelo nun 60,3 %, vinte e dous puntos por encima da media galega.
Ese efecto favorece que nestas dúas provincias haxa localidades nas que a emigración pesa máis que o censo interior. Cinco municipios xa teñen máis posibles votantes no estranxeiro que no seu propio territorio: Avión (reúne ao 54,11 % do seu censo no exterior); Bande (53,9); Gomesende (53,8); Arnoia (52), e Quintela (50,6).
Outros doce teñen a máis de catro de cada dez hipotéticos votantes residindo noutros países, e en total son 107 nos que polo menos un cuarto dos seus censos están en idéntica situación.