(17/02/2012)
A Defensora do Pobo pide que se erradiquen as redadas raciais
Venres, 17 de Febreiro de 2012
A Policía debe 'erradicar' a realización de controis de identidade baseados en perfís étnicos e raciais. Así o solicitou a Defensora do Pobo, María Luisa Cava de Llano, á Dirección Xeral da Policía (DGP), tras investigar a queixa presentada polo avogado e presidente de CEAR Euskadi, Javier Galparsoro.
Segundo informa Europa Press, a oficina do Defensor do Pobo pediu as respectivas alegacións á Dirección Xeral de Policía, que argumentou que as identificacións non están vinculadas á Lei de Estranxeiría nin á Circular 1/2010, porque obedecen a 'labores preventivos que afectan tanto a cidadáns estranxeiros como españois' e explicou que 'o traslado a comisaría dun estranxeiro debidamente identificado pero en situación irregular en España atopa amparo legal' na Lei de Estranxeiría e na de Seguridade Cidadá.
Ademais, aclarou que de non dar cumprimento a 'as funcións previstas na lexislación de Estranxeiría, refuxio, asilo, extradición, expulsión emigración e inmigración' que a normativa atribúe ao Corpo Nacional de Policía, 'podería ser obxecto de responsabilidade disciplinaria por abandono de facultades ou deberes'.
Tras recibir estas explicacións, a oficina do Defensor do Pobo solicitou á DGP que dea as instrucións oportunas aos axentes para 'erradicar a práctica policial detectada consistente en controis de identificación, baseados en perfís étnicos e raciais'.
Así mesmo, recomendou que se implanten os mecanismos de control para verificar o número e a motivación das identificacións realizadas na vía pública por funcionarios do Corpo Nacional de Policía e que se modifique a Circular 1/2010 de 25 de xaneiro que instaba a axilizar a tramitación dos procedementos sancionadores a inmigrantes sen permiso de residencia, de modo que 'sexan correctamente interpretados os supostos de 'detención cautelar' e traslado a comisaría de cidadáns estranxeiros identificados'.
Cava de Lano tamén recordou á Policía o seu deber legal de non deter a cidadáns estranxeiros debidamente identificados se non se dan os requisitos legais para que se produza unha detención penal, unha detención en aplicación da Lei de Seguridade Cidadá ou dunha das detencións cautelares contempladas na Lei de Estranxeiría.
www.redinmigrante.es
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas