Lugo. Numerosos suramericanos e marroquís retornan aos seus países

(24/01/2012)

Numerosos suramericanos e marroquís retornan aos seus países

O paro anímaos a deixar a provincia para abrir negocios

Autor:

lucía rei

Localidade:

lugo / a voz

Data  24/01/2012

Decenas de inmigrantes de Marrocos e de países do centro e do sur de América que levaban anos asentados na provincia de Lugo están a facer as maletas para regresar aos seus países. Aínda que aínda non hai estatísticas oficiais, asociacións da capital que traballan con estes colectivos sinalan que o paro e a falta de oportunidades está a animar a moitos a retornar aos seus lugares de orixe para crear pequenos negocios co diñeiro que aforraron en España. «A xente que traballaba na construción agora está no paro. Os que quedan están na venda ambulante, pero moitos están a marcharse a Marrocos», sinalan desde a asociación Integración, que agrupa a uns noventa marroquís.

O mesmo ocorre cun bo número de colombianos, dominicanos, peruanos, ecuatorianos ou brasileiros que en Lugo estiveron empregados en sectores como a hostalería. Moitos esgotaron as prestacións e ven abocados a solicitar a Renda de Integración Social de Galicia (Risga), coa que cobran uns 400 euros ao mes. «Coa crise, moita xente de Santo Domingo [República Dominicana] está a irse de Lugo para buscarse a vida», destaca Lissete, inmigrante dominicana. Comenta que algúns retornados montan pequenas tendas de roupa ou de comestibles. «Se alí tes con que ir tirando, non che vas á ruína», subliña a muller, que ten a nacionalidade española.

En Marrocos, algúns inmigrantes retornados son contratados por empresas españolas, como Alsa. Ao parecer, teñen dúas vantaxes: por unha banda, o idioma, xa que falan español; e por outro, o coñecemento das formas de traballo. «Pasaron tempo en España e ao volver pon en práctica cousas que aprenderon aquí. Non son os mesmos que cando se marcharon», comentan nunha asociación.

A porcentaxe de inmigrantes é maior en Monforte que en Lugo

Autor:

c.c. monforte / a voz

As estatísticas oficiais din que no sur da provincia de Lugo vivían algo máis de 4.000 persoas nacidas no estranxeiro durante o 2010. A desagregación desas cifras por municipio e o cálculo do peso porcentual da inmigración en cada localidade proporciona algún resultado curioso. Por exemplo, que a porcentaxe de poboación estranxeira en Monforte supera o do municipio de Lugo. No conxunto da provincia, o peso relativo da poboación de orixe foránea só é máis grande que en Monforte en Burela, un porto pesqueiro que enrola nos seus barcos desde hai anos a gran cantidade de mariñeiros estranxeiros, entre eles unha extensa colonia de caboverdianos.

De acordo coas cifras do Instituto Nacional de Estatística [ver gráfico] en Monforte estaban empadroadas no 2010 un total de 1.879 estranxeiros. É dicir, un 9,57% da poboación total do municipio.

No Courel o 2,26%

En Lugo, o número de estranxeiros era moito maior -7.771-, pero en relación coa poboación total supón unha porcentaxe menor, do 7,96%. En Burela, os estranxeiros eran entón o 14,16% do total de veciños.

En canto ao resto da metade sur da provincia, o municipio cunha maior porcentaxe de inmigrantes por detrás de Monforte era Chantada (640 en total e un 7,15% de peso relativo). A continuación aparecía O Saviñao, con 299 persoas e un 6,7%; Quiroga, con 251 e un 6,66%; Taboada, con 212 e un 6,23%; e Pantón, con 179 e un 6,09%.

En todos os demais, a porcentaxe de poboación inmigrante non chega nin sequera ao 6%. O municipio no que no 2010 había menos veciños nacidos no estranxeiro era Folgoso do Courel, con 27 sobre un total de 1.196, só un 2,26%. No Incio eran un 3,72%, en Carballedo un 4,32%, en Sober un 5,54%, na Pobra do Brollón un 5,61%, e en Ribas do Sil un 5,81%.