Repunta a chegada por mar de sen papeis africanos

(13/01/2012)

Repunta a chegada por mar de sen papeis africanos

O número de inmigrantes que tratan de chegar a España dende África creceu un 26% en 2011

PAULA DÍAZ Madrid 12/01/2012


Salvamento Marítimo rescatou 56 inmigrantes subsaharianos o pasado 17 de novembro nas costas de Motril (Granada).-EFE

Non un futuro mellor, senón, simplemente, un futuro. Iso é, segundo os expertos, o que buscaban os inmigrantes africanos que o ano pasado se xogaron a vida para intentar chegar a España. Foron en total, 8.867 persoas, segundo os resultados do Balance Migratorio Fronteira Sur 2011, presentado onte pola Asociación Pro Derechos Humanos de Andalucía (APDHA).

O informe, que recolle datos publicados en prensa, comunicados oficiais e diferentes asociacións, revela un repunte nos fluxos migratorios procedentes de África. Aínda que entre 2008 e 2010, o número de chegadas (ou intentos de chegada) descendeu progresivamente, o ano pasado produciuse un incremento do 26,5% (1.473 chegadas máis). A APDHA advirte, ademais, que a esa cifra habería que sumar as persoas que non chegaron ou as que lograron pasar o muro da vergoña sen ser detectados". Segundo estimacións da organización, o aumento podería ter sido, en realidade, dun 65%.

Durante 2011 houbo 84 mortos e 114 desaparecidos entre os inmigrantes

Andalucía foi a principal receptora, con 3.357 persoas contabilizadas nas súas costas, seguida das cidades de Ceuta e Melilla (con 1.258 e 1.309, respectivamente) e Canarias (367). Outros 1.225 inmigrantes foron interceptados polo Goberno marroquí. En canto á procedencia dos inmigrantes, a maioría son de África subsahariana (5.539), magrebís (1.695) e alxerianos (1.525).

En pateira
Máis dun millar e medio de persoas intentaron cruzar o Estreito a nado, aínda que as pateiras e as balsas neumáticas foron o método máis utilizado para intentar traspasar as fronteiras. Coa perigosidade que supoñen ambos os dous sistemas, non é de estrañar que outro dos incrementos notables faga referencia ao número de vidas perdidas nas augas que separan as costas españolas das africanas: 131, en 2010 fronte a 198, o ano pasado. De entre eles, 84 morreron e outras 114 foron dados por desaparecidos.

Un experto: "Foxen da miseria e a falta de solidariedade de Occidente"

"É preciso sinalar as enormes dificultades e a precariedade coa que se intenta dar o salto: persoas que non saben nadar e se tiran á auga, balsas de xoguete enfrontándose ás correntes, saltos de valo de espiños... ", enumera a APDHA.

Por que xogarse a vida, tendo en conta a crise que hai en Europa? "A expectativa de prosperar segue sendo mellor que a dos seus países", explicou o voceiro da organización, Rafael Lara. "En África hai máis de nove países en guerra e 12 con revolucións internas", recordou durante a presentación do informe, en Cádiz, informa Efe.

Esteban Ibarra, presidente do Movemento contra a Intolerancia, tamén o cre así. "Aínda que corren o risco de morrer, a súa é unha fuga cara á vida", sentenciou. "Foxen da miseria, da fame, das guerras e da falta de solidariedade de Occidente, que só quere apropiarse dos seus recursos", engadiu.

As mulleres son o 5,4% dos africanos que tratan de chegar á costa española

Para Mikel Mazkiaran, voceiro de SOS Racismo, os datos deste último balance contrastan coa tendente "autorregulación" do fluxo migratorio. "Os datos globais mostran unha diminución do fluxo entrante e un aumento da emigración e é unha tendencia que xa apuntaba dende 2009", argumentou.

Non obstante, non considera estraño que no caso concreto da inmigración africana, a situación sexa a contraria. "África está chea de países en situacións límite e por iso o seu proxecto migratorio é totalmente distinto, por exemplo, ao latinoamericano", explicou Mazkiaran. "Uns veñen con expectativas laborais de mellora de vida; outros, simplemente, a subsistir", detallou.

Fame e seca
O cambio climático, as secas e a fame son, xunto aos conflitos e as guerras, as causas principais dos desprazamentos da poboación africana. "África é a gran materia pendente do mundo", apuntou Ibarra. Por iso, "ante as súas circunstancias, non importan nin a crise europea nin a discriminación ou o racismo que sofren ao chegar", argumentou tamén Mazkiaran.

Entre esa poboación que foxe dos horrores do seu continente, encóntranse 494 menores de idade. Aínda que, de novo, a APDHA sospeita que esta cifra pode ser maior se se engaden os que non puideron contabilizarse. Aínda así, os nenos supoñen un 6,23% dos inmigrantes africanos que chegaron (ou intentaron chegar) a España durante o pasado ano. "Os menores marroquís son, na súa maior parte, de entre 13 e 18 anos e veñen cun proxecto migratorio propio, non acompañados", detalla a APDHA. Os subsaharianos, en cambio, adoitan ser máis pequenos e, normalmente, chegan coas súas nais.

De feito, as mulleres representan o 5,4% do total dos inmigrantes africanos: 470 en total. "A práctica totalidade son de orixe subsahariana, un bo número delas, embarazadas ou con nenos moi pequenos", conclúe o informe da organización humanitaria.