Bruxelas pon en marcha o portal da inmigración para axudar a trasladarse á UE

Bruxelas pon en marcha o portal da inmigración para axudar a trasladarse á UE

18/11/2011



Onde se solicita un permiso de traballo alemán? Necesitan os cidadáns indios permiso de residencia para estudar en España? A quen pode pedir axuda se é vítima de explotación laboral?

Cecilia Malmström, Comisaria Europea de Asuntos de Interior inaugurou hoxe o «Portal da Inmigración da UE», un sitio internet con información práctica para os cidadáns estranxeiros interesados en trasladarse á UE. O sitio ec.europa.eu/immigration, tamén vai dirixido aos migrantes que xa residen na UE e que desexarían trasladarse dun Estado membro a outro. Facilita información específica para cada categoría de migrantes sobre os procedementos de migración nos 27 Estados membros.

A Comisaria Malmström sinalou que «moitas persoas que queren trasladarse á Unión Europea non coñecen as posibilidades que hai, nin o xeito de solicitar un permiso de residencia, nin os riscos relacionados coa migración irregular. Ademais, os migrantes que xa residen na UE non sempre coñecen os seus dereitos. Temos que proporcionar información sólida e de fácil acceso sobre estes procedementos que en ocasións son complicados.»

O Portal da Inmigración da UE é un primeiro punto de acceso a información práctica e actualizada sobre os procedementos e políticas nacionais de inmigración na UE. Traballadores, investigadores, estudantes, así como as persoas que desexen reunirse cos membros da súa familia xa residentes na UE poden atopar información adaptada ás súas necesidades, achega do Estado membro ao que desexan trasladarse. Este Portal tamén conecta directamente cos sitios de internet das autoridades nacionais relacionadas con asuntos de inmigración. Os usuarios tamén atoparán información clara sobre os seus dereitos e sobre os requisitos de visado para entrar na UE.

O Portal da Inmigración da UE explica como entrar na UE de forma legal e describe os riscos inherentes á migración irregular, como tráfico de seres humanos e contrabando. Os migrantes e posibles migrantes terán acceso a unha ampla listaxe de organizacións gobernamentais e non gobernamentais que poden prestarlles axuda. Ademais, as organizacións de apoio aos migrantes, por exemplo as autoridades de inmigración, os servizos de emprego e o persoal académico tamén poden utilizar a vasta información accesible a través do sitio internet.

O Portal de Inmigración da UE está dispoñible en inglés e francés en: http://ec.europa.eu/immigration/ Estanse realizando versións en árabe e español, así como melloras para facelo máis accesible desde diferentes plataformas técnicas.



Durante a realización do Portal da Inmigración da UE, a Comisión levou a cabo un amplo proceso de consulta, que incluíu ás organizacións de apoio aos migrantes, os sindicatos, as asociacións de empresarios e os grupos relixiosos dos países de orixe, tránsito e destino. Estas consultas realizáronse en Bélxica, República Checa, Francia, Alemaña, España e Mali.

Na UE, 20,1 millóns de persoas son cidadáns de terceiros países, o que representa en torno ao 4 % do total da súa poboación. En 2010, os Estados membros da UE e os países participantes na cooperación Schengen expediron máis de 11 millóns de visados. O número estimado de vítimas de trata de seres humanos cara á UE ou dentro do seu territorio elévase a varios centos de miles ao ano.