(16/11/2011)
Os fiscais pedirán a expulsión dos irregulares que rouben reiteradamente
Mércores, 16 de Novembro de 2011
Cando os fiscais de Estranxeiría se atopen ante o caso dun inmigrante en situación irregular que cometa faltas ou delitos de forma reiterada, especialmente roubos, pedirán ao xuíz que substitúa a pena de privación de liberdade pola expulsión. Deste xeito, quérese evitar que a concatenación deste tipo de faltas beneficie ao infractor ao alargar a súa estancia en España polos enxuizamentos.
Así o indica a Instrución 5/2011 que ditou a Fiscalía Xeral do Estado (FGE) para dar a coñecer as actuacións que deben seguir os fiscais de estranxeiría nesta materia e na aplicación das normas contra o tráfico de inmigrantes e a trata de persoas con fins de explotación sexual ou laboral.
A lexislación actual permite ao xuíz substituír a pena de privación de liberdade pola expulsión cando o condenado é un estranxeiro sen permiso de residencia, sempre que a sentenza non impoña máis de seis anos de privación de liberdade, xa que para delitos máis graves prevese o cumprimento da condena en España.
A circular aclara que non se trata de afirmar que é posible a expulsión sustitutiva pola mera comisión dunha falta', senón que 'non será desproporcionado' facelo 'cando a falta ou o delito cometido sexa a última das manifestacións indicadoras dunha forma de vida patentemente contraria á orde pública española, como o acreditaría a existencia dunha pluralidade de condenas'.
O mesmo ocorrería, segundo a FGE, cando a falta ou delito cometidos supoñan 'un instrumento defraudatorio do réxime xurídico da estancia e residencia dos estranxeiros en España' ou cando 'signifique un obstáculo para a execución da expulsión acordada noutro procedemento penal por delito'.
Con todo, si considera 'inxusto e desproporcionado' optar pola expulsión dos inmigrantes en situación irregular que sexan condenados a penas privativas de liberdade inferiores a seis anos por falta de pagamento de multas ou por faltas illadas, polo que non solicitará a expulsión nestes casos. www.redinmigrante.es
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas