O Foro Galego pon en marcha unha campaña de información a inmigrantes

(09/11/2011)

O Foro Galego pon en marcha unha campaña de información a inmigrantes

Autor:

santiago / a voz

Data

             09/11/2011

O Foro Galego de Inmigración porá en marcha entre o 12 de novembro e o 18 de decembro unha campaña informativa dirixida ao colectivo de inmigrantes sobre a situación das empregadas de fogar e os cambios que se producirán coa entrada en vigor do regulamento da Lei de Estranxeiría. Miguel Fernández, portavoz do Foro, indicou que, como consecuencia da crise, os inmigrantes están a perder puntos de encontro para reunirse e intercambiar información. Por iso e, ante cuestións que poden afectarlles directamente como son as dúas normativas citadas, o Foro porá en marcha dúas «conversatorios» nos que se abordarán ambos os temas e aos que se invita a inmigrantes para que «se manteñan informados».

Actos reivindicativos

O primeiro será o sábado 12, ás 17 horas, no local de Gondwana (Rosalía de Castro, 98-1º), onde membros da Asociación Xiara informarán sobre os cambios na normativa de empregadas de fogar. Fernández indicou que, aínda que a nova lexislación implica que as empregadas poderán ser dadas de alta polas horas que traballan, no caso dos inmigrantes pode carrexar problemas, xa que moitas danse de alta para xustificar un traballo.

A segunda charla será o día 19, á mesma hora e no mesmo local. Neste caso, Laura Bugallo ofrecerá unha charla sobre a Lei de Estranxeiría, que desde o Foro consideran que «dificultará aínda máis a vida cotián dás persoas migrantes». As dúas charlas celebraranse tamén na Coruña e en Boiro. Doutra banda, o 18 de decembro celebraranse en Santiago, A Coruña e Boiro actos musicais para reivindicar os dereitos da poboación inmigrante.

O Foro alertou das graves consecuencias que terá para a poboación inmigrante o cambio para a obtención do cartón sanitario, que obriga a unha antigüidade de seis meses no censo. Fernández asegurou que esta poboación ten que cumprir moitos requisitos e non veñen a Galicia por razóns médicas.