A asociación Liga Santaballesa publicou un libro DVD dedicado á emigración cubana dos galegos e galegas procedentes de Vilalba durante o século pasado. O Legado Migratorio Santaballés consta dun DVD que recolle o documental en galego e castelán, un vídeo da súa presentación elaborado pola Fundación TIC, un tráiler, o making off con fotografías da rodaxe e de Santaballa, ademais da peza musical Negra Sombra de Luz Casal. O traballo vai ademais acompañado dun libro, escrito polo historiador Daniel Manuel Vázquez, no que se presenta o traballo feito pola Liga.
A produtora Imaxina contou coa colaboración dos veciños e veciñas da antiga escola habaneira da parroquia para a súa posta en escena. Cunha tirada de 500 copias, repartirase en centros educativos da provincia de Lugo e enviarase a centros e sociedades galegas de toda España e doutros países, fundamentalmente aos do outro lado do Atlántico onde a emigración galega foi máis alta, como Cuba, Arxentina ou Uruguai.