Uruguaios e galegos estrean sede social e cultural

 «Integrar a uruguaios e galegos e «mostrar o noso agradecemento a Galicia». Isto expón José María Acosta como un dos principais obxectivos do novo centro social e cultural Uruguai-Galicia, do que é presidente e impulsor. As bandeiras unidas de ambos os países lucirán en breve na fachada da sede situada no primeiro C do número 189 da avenida do Xeneral Sanjurjo. Acosta, que leva 18 anos «acá», mostra un local que teñen previsto que sexa inaugurado a mediados deste mes. A este novo centro están a empezar a acudir, sobre todo os fins de semana, tanto uruguaios que viven na cidade como galegos que no seu día foron emigrantes naquel país e un bo número de matrimonios mixtos. «Estiven a mirar e hai catro anos en Coruña había 1.650 uruguaios, pero agora moitos están a regresar», explica a vicepresidenta da nova entidade, María Teresa Berretta Dellacasa. Ela ten unha ampla experiencia sobre emigración: «Os meus pais eran italianos e coa guerra marcháronse a Uruguai; agora, eu vinme aquí cos meus fillos». Sobre ese regreso ao país de orixe achegan un dato: «Cada mes regresan a Uruguai unhas 300 persoas, sobre todo de España, Estados Unidos e Arxentina, e somos un país pequeno, de menos de catro millóns de habitantes». Entre os elementos da decoración do novo centro social e cultural hai uns carteis mostrando como facer mate, ademais de bandeiras, bustos e mapas alusivos a ambos os países. Polo momento están programadas xa dúas actividades: clases de tango e de taekuondo, aínda que a idea é «impartir coñecementos da historia uruguaia e da influencia de España, que á fin e ao cabo está detrás de todo», conclúen tras mostrar os carnés que están a recibir todos aqueles que se van facendo socios.