A Casa Galicia de Bos Aires celebrou o seu 78º aniversario na súa sede do barrio porteño de Monserrat. A conmemoración tivo lugar o pasado día dous e congregou máis de 200 persoas socias e amigas. Durante a celebración, Evelyn Panelli Ouzande foi elixida raíña da institución para o período 2011-2012.

O presidente da Asociación, Manuel Eiranova, acompañado pola secretaria de Organización, María Teresa Tonelli, e a secretaria de actas e xerente da institución, María del Pilar Cordero, entregaron unha banda e un ramo de flores á representante xuvenil da Casa.

A festa contou coa presenza da banda de gaitas, que acompañou ao corpo de baile da institución no seu debut na asociación, e a orquestra Agora Xuntos, dirixida polo mestre Ademar Álvarez, interpretou os himnos de Arxentina, España e Galicia e animou o baile que se prolongou ata entrada a tarde. A preparación da queimada, estivo a Cargo de José Cobas.