Para o 20-N están convocados a participar 8.000 persoas máis que nas eleccións xerais do ano 2008. A pesar de que o censo de residentes en Ourense perdeu máis de 3.000 votantes neste período, o incremento de emigrantes con dereito a voto serve para compensar sobradamente esa caída. Se a 1 de xaneiro do 2008 había 74.202 persoas que, a pesar de residir no estranxeiro, podían participar nos comicios, para estas eleccións a cifra subiu ata as 85.408. O peso do voto emigrante, que tradicionalmente se decanta polo partido que ostenta o poder, podería, xa que logo, ser determinante para a repartición de deputados na provincia de Ourense.

A Oficina do Censo Electoral xa traballa na preparación do 20-N e onte pechábase o prazo para a presentación de reclamacións de inclusión ou exclusión nas listas de votación. A falta, xa que logo, de variacións de última hora, en Ourense poderán votar 362.640 persoas, entre aquelas que o poden facer en urna e os que o farán desde o estranxeiro. Esta cifra supón un incremento de aproximadamente 8.000 persoas respecto ao ano 2008.

Os residentes en Ourense poderán votar en 560 mesas repartidas en 440 colexios electorais. Para moitos será a primeira vez que poidan votar. Concretamente, na provincia terán a posibilidade de estrearse nunhas xenerais 9.304 persoas que cumpriron os 18 anos logo de marzo do 2008. Para 1.261 deles serán, ademais, as súas primeiras eleccións xa que o seu aniversario foi logo das municipais de maio.

362.640

Censo total

No ano 2008 podían votar 8.000 persoas menos.

85.408

Emigrantes

O CERA incrementouse en máis de 10.000 persoas.

9.304

Novos electores

Case 10.000 mozos cumpriron 18 anos desde o 2008.