• O acto está organizado pola Coordinadora Federal das Asociacións Galegas en Alemaña.

O próximo 23 de xullo a Coordinadora Federal das Asociacións Galegas en Alemaña celebrará na localidade lucense de Palas de Rei a VI Xuntanza da Emigración á que está previsto que asistan ao redor de 2.000 persoas.

Durante a xornada farase entrega ao Secretario Xeral da Emigración da Xunta de Galicia, Santiago Camba, da Medalla de Ouro da Coordinadora, segundo informou o seu máximo responsable, Ramiro Vieito. Ademais, tamén se entregarán outras 15 medallas de prata a diferentes personalidades da sociedade galega que se distinguisen polo seu traballo a favor da emigración.

A Coordinadora Federal das Asociacións Galegas en Alemaña agrupa ás 13 entidades galegas que existen no país xermano e para organizar este evento conta coa colaboración do Concello de Palas de Rei e da propia Secretaría Xeral da Emigración do Goberno galego.