Son 218 emigrantes galegos residentes en América Latina que onte cumpriron o seu soño de regresar á terra. O máis maior deles realizou esa viaxe de volta con 98 anos, procedente de Arxentina. Onte empezaron a arribar ao aeroporto de Santiago, grazas ao programa da Xunta Reencontros na Casa, que axuda aos cidadáns residentes noutros países a pasar as vacacións na súa terra natal.

Pasada a unha da tarde, aterrou en Lavacolla o voo IB 554 con 76 emigrantes procedentes de Uruguai e Chile. Sobre as cinco, chegaba outro avión procedente de Brasil e Arxentina, e minutos antes das oito facíao un terceiro con residentes en Arxentina e Cuba. Para terminar, esta tarde chegarán o resto de participantes, procedentes de Venezuela.

«Reencontros na Casa» busca facilitar unha viaxe a Galicia que algúns dos participantes non fixeron ata agora desde que deixaron o seu lugar de orixe. A Xunta subvenciona o 60 % do custo do voo, excepto no caso de Cuba e Venezuela onde cobre o 80 % do prezo. Ademais, a administración autonómica encárgase do contacto cos familiares.

Aínda que entre os requisitos destaca o ter máis de 55 anos, a realidade é que os máis de 200 participantes superan con fartura esta condición. Destaca un participante procedente de Arxentina con 98 anos e outros tres deste país e Uruguai de 89 e 88.