O Secretario Xeral da Emigración da Xunta de Galicia, Santiago Camba, reuniuse o pasado mércores cos presidentes das 49 sociedades galegas en Cuba. O Secretario trasmitiu aos galegos de Cuba un saúdo de Alberto Núñez Feijóo, «quen entre as súas tantas preocupacións sempre mantén un especial interese polo seu paisanos en Cuba e polo pobo cubano en xeral», declarou Camba.

Na reunión, os presidentes das sociedades galegas na illa nomearon presidente de honra da Federación de Sociedades Gallegas de Cuba ao expresidente da Xunta Manuel Fraga. O Secretario Xeral agregou que veu a Cuba, «para encontrarme cos galegos deste país polos cales nos preocupamos e nos ocupamos, e para coñecer de primeira man as súas opinións en temas da vida galega actual, as súas inquietudes e opinións».

Durante o encontro cos presidentes, Camba fixo público un recoñecemento ao esforzo e dedicación dos dirixentes galegos na illa para «manter a historia, o folclore e as tradicións galegas, así como a pegada galaica neste país».