Un mural realizado en granito silvestre rende homenaxe na nova praza pública da casa do concello do Incio a todas as persoas que viviron a experiencia da emigración. A obra é da autoría do escultor deste municipio Álvaro Pereiro, quen dedicou cinco meses de traballo a dar forma a esta peza, de 2,5 metros de longo e 1,5 de altura.
Segundo explica, o mural foi un encargo do Concello, cuxo alcalde, Anxo Camiño, propuxo como tema a emigración. «O Incio foi un concello no que houbo moitos emigrantes. Primeiro a países como Arxentina ou Cuba, nos anos 60 a Alemaña e despois a outros lugares como Francia, Suíza ou Inglaterra. Sen ir máis lonxe, o meu avó estivo en Cuba e o meu pai en Alemaña», apunta.
Ademais de esculpir a obra, Álvaro Pereiro fixo o bosquexo e ideou a composición, que representa a marcha dun emigrante deixando atrás muller e tres fillos pequenos. A escena complétase cun can e un castiñeiro, árbore autóctona dos montes de Galicia.
Tres pezas
Para o escultor, esta é a súa terceira obra en lugares públicos do Incio. Da súa autoría é tamén o escudo que, dende mediados dos anos 90, loce na fachada da casa do concello, cunha coroa de «900 quilos de peso». Ademais, tallou o busto do párroco Anxo González, que se pode ver no adro da igrexa de San Pedro Fiz de Hospital.
TRAXECTORIA
O autor abriu en 1998 o Museo da Pedra en Buxán
Dende o ano 1998, Álvaro Pereiro mantén aberto ao público o Museo da Pedra, na localidade de Buxán, onde exhibe algunhas das súas creacións, xunto con pezas recuperadas en castros da zona, como un muíño ou fragmentos dun machado.
Afección
O interese pola escultura naceulle a moi curta idade. «Supoño que irá algo na xenética», di este veciño, herdeiro dunha familia de canteiros e fascinado dende neno pola heráldica. Ao longo da súa traxectoria expuxo en cidades como Barcelona ou Córdoba, onde mesmo recibiu un premio.