Cinco países mediterráneos da UE, entre eles España, pediron axuda á Unión Europea para facer fronte á forte presión migratoria que sofren por mor das revoltas populares no norte de África. Chipre, Grecia, Italia e Malta, ademais de España, asinaron un comunicado conxunto tras un encontro que celebraron en Nicosia no que propoñen como xestionar e previr mellor a inmigración ilegal, o asilo e a protección dos refuxiados.

O comunicado urxe á UE a «ofrecer apoio operativo e financeiro aos Estados membros que afrontan un fluxo migratorio masivo e desproporcionado» como o que chega do norte de África. Os cinco países que o asinaron tamén reclamaron programas de repatriación reforzados e que se revisen as regulacións de Dublín II, que determinan que Estados da UE son responsables de procesar as demandas de asilo.

500 indocumentados

A reunión coincide coa chegada de máis de 500 persoas a bordo dunha embarcación á pequena illa de Lampedusa. Un oficial dos gardacostas italianos asegurou que a maioría dos refuxiados contaron que partiran de Trípoli, capital de Libia, durante a madrugada de hai dous días, aproveitando que o vento diminuíra. Numerosos nenos e mulleres, entre elas unha embarazada de oito meses, chegaron na embarcación, de 25 metros de eslora, a cal navegaba cara a Sicilia cando foi interceptada por dúas navíos militares italianos, que a escoltaron a Lampedusa.

O viceministro de Interior italiano, Alfredo Mantovano, presente en Chipre, dixo que o seu país recibiu durante os últimos tres meses a 30.000 persoas provenientes de Tunisia e a 8.000 que escaparon de Libia.

Doutra banda, segundo informa Efe, o secretario de Estado español para Asuntos Europeos, Diego López Garrido, pediu á Comisión Europea que precise en que casos pódese acordar a suspensión temporal do espazo Schengen, para evitar disputas como a que manteñen na actualidade Francia e Italia.

Diego López Garrido, que asegurou que a «última noticia é que as cousas se van arranxando» entre Francia e Italia, sinalou que a Comisión debe definir «as posibilidades e criterios para suspender o acordo Schengen» e facilitar a súa interpretación.