Emigrantes da zona en Arxentina celebraron o outono

Emigrantes de Soneira e Fisterra en Arxentina celebraron o pasado fin de semana cunha romaría galega a chegada do outono austral. Foi a Asociación Benéfico Cultural (ABC) do Partido de Corcubión a que promoveu a Noite de lúa e gaitas na arboleda de plátanos e tilos que este colectivo ten na localidade de Vicente López (Buenos Aires).

Acudiron medio milleiro de persoas, segundo informou o presidente da ABC, o vimiancés de Salto Carlos Ameijeiras Miñones, «para gozar da música e o baile de Galicia e doutros recunchos».

Ao escenario montado ao aire libre subíronse agrupacións musicais e de danza de diversos centros da colectividade galega na cidade bonaerense.

Ademais do grupo Alborada, da ACB de Corcubión, actuaron as escolas do Centro Galicia de Buenos Aires e as formacións de Residentes de Mos, Asociación Fillos de Zas, Centro Partido de Carballiño, Círculo Social de Val Miñor, Centro Arzuán Melidense, Sociedade Parroquial de Vedra, Sociedade Galega de Arentei, Vilamarín e A Peroxa e Unión do Partido Xudicial de Ordes, ademais do Centro do Arquipélago Canario, o grupo irlandés Twuan e o ballet de tango e folclore arxentino Raíces e Tradicións.

Conta Carlos Ameijeiras que, ademais do espectáculo, «houbo boas tortillas, callos, empanada e grella típica arxentina». A noite terminou, segundo di, «degustando queimada».

A ACB de Corcubión cumprirá o próximo 2012 os 90 anos de existencia. Esta entidade foi creada en 1992 polos emigrantes dos oitos municipios de Soneira e Fisterra para facilitar a educación e a instrución nos seus municipios de orixe. Por iso é polo que financiasen escolas en lugares da zona como Pasarela (Vimianzo), Estorde (Cee), Nemiña (Muxía) ou Suarriba (Fisterra), entre outros.

Carlos Ameijeiras visitou o pasado verán a Costa da Morte, onde deu a coñecer as actividades desta asociación.