A mediados do mes de abril as persoas inmigrantes que chegan a Vilagarcía ou que viven xa na capital arousá disporán dunha guía de recursos e de información, un instrumento que a concellaría de Benestar do Concello de Vilagarcía puxo en marcha co obxectivo de facilitar a integración dese colectivo.

A responsable do departamento municipal, Ana Lorenzo, argumentaba onte que na actualidade o 4,6% da poboación de Vilagarcía é inmigrante. Trátase, ademais, de persoas que xeralmente necesitan utilizar moitos recursos sociais aos que ás veces teñen dificultades para acceder, xa sexa por problemas de idioma ou de coñecemento.

Pensando niso, a concellaría xa deseñara un folleto informativo e tamén programou un curso dirixido fundamentalmente a fomentar o asociacionismo. Agora estase traballando nunha guía que pretende ser un resumo de todas esas accións, un catálogo de servizos que tamén pode ser utilizado por toda a cidadanía.

Será un documento amplo que a partir de mediados do mes que vén estará colgado na páxina web municipal, www.vilagarcia.es. Ademais, unha versión máis sinxela editarase en papel. Tanto o formato dixital da guía como o escrito se editarán en catro idiomas: español, galego, inglés e francés.

Os autores desta iniciativa explicaban onte que tanto na web como en papel se estruturou ao redor de cinco apartados diferentes, que se identificarán por cores. No primeiro abordaranse cuestións de importancia, como os pasos que deben seguir para entrar no noso país. No segundo trátase de orientar aos inmigrantes nos seus primeiros pasos no noso país (empadroamento, cartón sanitario e residencia). Os recursos do Concello centran o terceiro bloque temático, con cuestións de interese como os centros de estudos, a vivenda ou recursos para a muller. Convivencia e participación cidadá e un rueiro son os últimos apartados da publicación.

Á vez que presentaba esta iniciativa, a concelleira Ana Lorenzo insistía onte na súa idea de que Vilagarcía necesitaría contar cunha oficina específica de atención ao inmigrante, unha solicitude que trasladou á Xunta pero para a que non obtivo apoio.