• Trátase dos participantes no curso de formación “Redes Sociais na web e técnicas de hardware”, financiado pola Xunta de Galicia.

O Conselleiro de Presidencia, Administracións Públicas e Xustiza, Alfonso Rueda, e o Secretario Xeral de Emigración, Santiago Camba, fixeron entrega onte na Fundación ECAP de Zürich dos diplomas aos 50 alumnos do curso de formación “Redes Sociais na web e técnicas de hardware”, financiado pola Xunta de Galicia.

No acto Rueda destacou o importante esforzo orzamentario que está a levar a cabo o Goberno autonómico para garantir os servizos máis básicos dos galegos, vivan onde vivan, especialmente en eidos tan importantes para a sociedade como son a Sanidade, os Servizos Sociais ou a Educación.

Precisamente neste último eido é onde se enmarca a acción formativa en informática que se desenvolveu no centro suízo e que segundo o Conselleiro “enlaza a nosa responsabilidade como Goberno coa realidade dun país galego con múltiples existencias e realidades, fóra e dentro das súas fronteiras”.

Rueda destacou que a formación en informática e redes sociais que o Goberno vén de achegar á diáspora serviralle para “ intentar entender este mundo cambiante e intercambiar experiencias e esperanzas” con outros galegos de calquera parte do mundo e será unha “arma máis” para encarar o futuro.

Segundo o Conselleiro, a través destas novas ferramentas informáticas a Xunta trata de espallar dentro e fóra do seu territorio unha mensaxe de esperanza para os galego de dentro e fóra de Galicia: “todos xuntos sairemos antes deste momento de afogo económico”.