Un conflito iniciado en febreiro polo colexio

O conflito entre os pais da menor e o colexio remóntase á primeira semana de febreiro, cando o xefe de estudos negou á alumna a posibilidade de ir a unha excursión porque no regulamento interno do centro prohibíase desde decembro levar panos na cabeza. Nun primeiro momento, tanto os pais como o Concello de Arteixo sopesaron a posibilidade de cambiar á menor de centro. O pai da nena, Radawane Hakim, reuniuse co xefe de inspección de Educación na Coruña, quen lle transmitiu que presentase a documentación e que se lle daría resposta ao traslado. Pero a solicitude nunca foi enviada e o proxenitor confirmou o 18 de febreiro que a menor non sería cambiada de centro e que o asunto o levaba o seu avogado, Iván Jiménez Aybar, que tamén leva un caso similar, o da nena de Pozuelo. Ao día seguinte sabíase que o Concello remitira o regulamento do colexio ao Tribunal Superior de Xustiza de Galicia para tratar de impugnalo, e Jiménez Aybar anunciou, o día 24, que levaría o caso ante os tribunais. Ao día seguinte, a Xunta, que sempre explicou que respecta a autonomía do colexio, remitiu un escrito ao centro onde non consideraba irregular que se prohiba levar veo na aula, ademais de recordar que non se deben admitir «desigualdades entre alumnos e alumnas» ou «ningunha forma de machismo». Unhas conclusións que deron ás ao colexio para solicitar o traslado de centro á menor, pero iso non foi admitido por Educación, ao detectar erros formais na sanción porque o colexio non abriu expediente.