O catedrático de Dereito Eclesiástico do Estado da Univesidade dá Coruña e asesor da familia da nena do veo, Juan Ferreiro Galguera, considera que o colexio non reflexionou sobre a interpretación da norma, xa que non debe confundirse un símbolo relixioso cunha moda. Lonxe de crear polémica, explica que non é amigo de acudir sempre aos tribunais, aínda que en España «fai falta o pronunciamiento dun xuíz para que aclare se a administración educativa actúa de forma correcta».

O que foi subdirector de Promoción e Coordinación da Liberdade Relixiosa no Ministerio de Xustiza considera que o colexio debería pararse a pensar se esta situación afecta á paz do centro, á liberdade relixiosa de cada alumno e ás condicións idóneas para a aprendizaxe da menor.

Un dos aspectos que non deberían cuestionarse para Ferreiro é que «unha norma dun colexio non pode limitar a liberdade relixiosa do individuo», un dereito fundamental amparado pola lei orgánica. Ademais, subliña que o regulamento interno é incoherente e «cuestionable» porque, mentres prohibe levar veo a clase, si «recoñece a liberdade relixiosa dos alumnos».

Para Ferreiro, o burka non ten nada que ver co yihab, porque mentres o primeiro «é contrario á liberdade porque vulnera outros dereitos fundamentais», a utilización do veo procede dunha interpretación do islam onde «hai mulleres que consideran que se deben cubrir o cabelo e outras non».

O razoable, para Juan Ferreiro, é que «as autoridades académicas entren en razón» e que a sociedade defenda a liberdade relixiosa de cada individuo porque «non fai dano a ninguén» e é un dereito fundamental «que debe prevalecer sobre o resto». Ademais, a este catedrático chámalle a atención que as «autoridades policiais permitíronlle levar hiyab na foto que aparece no DNI» da menor de Arteixo e non o poida ter no colexio.