A comunidade musulmá Abou Baker anunciou onte que a actual sede da mesquita, situada no Alto de Arteixo, continuará sendo centro de oración. O colectivo decidiu realizar unha serie de reformas no local para cumprir coa normativa e que siga sendo utilizada como mesquita: «Xa chegamos a un acordo co dono do local», afirmou este colectivo. Desta forma, pretenden situar na nova casa que acaban de adquirir na Baiuca un centro cultural onde impartirán clases de árabe e doutras linguas, ademais de distintos talleres formativos.

As obras que van realizar na actual sede son «pequenas», segundo indicou a agrupación, e efectuaranse en canto a comunidade reúna o diñeiro que necesitan. Unha cantidade que os musulmáns explican que sairá dos seus propios donativos.